Chyum Mungga Daw (1)

1 Samuela 3: 3-10, 19

Ya hti na gaw, Samuela Laika Langai hta na rai nga ai.

Samuela gaw Madu a nawku nta hta, Karai Kasang a chyoi pra ai sumpu tawn da ai shara e yup nga yang,4Madu shi hpe shaga wu ai. Samuela gaw, Nang e nga nngai, ngu nna htan wu ai. Shaloi hkinjawng agyi Eli hpang de gat sa nna, Nang shaga ai majaw, wa ring ngai, ngu wu ai. Eli gaw, Ngai n shaga ai; naw yup nga su, ngu nna tsun jang Samuela wa nna bai yup nga ai. Bai Madu gaw, Smmuela e, ngu nna shi hpe bai shaga wu ai. Shi mung rawt nna Eli hpang de sa nhtawm, Nang shaga ai majaw wa ring nngai, ngu wu yang, Eli gaw Ngai sha e, ngai n shaga ai; bai wa yup nga su, ngu dat wu ai. Ya Samuela gaw Madu a lam hpe atsawm sha garai n chye nga ai; Madu mung shi a mungga shi hpe garai n tsun dan wu ai. 

Masum lang ngu na hta Madu gaw Samuela hpe shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, dai ma hpe Madu shaga nga ai gaw Eli dum wu ai. Dai rai ai majaw Eli gaw, Naw wa yup nga su; ya na lang bai shaga jang, Madu e, tsun rit; na a shangun ma madat nga nngai, ngu nna htan u, ngu dat wu ai. Shing rai Samuela bai wa nna, shi a shara e yup nga ai. Shaloi Madu sa tsap nna, shawng na zawn, Samuela, Samuela nga nna, shaga wu ai. Samuela mung, Tsun rit; na a shangun ma madat nga nngai, ngu nna htan wu ai. Samuela kaba wa nna, Madu shi hte rau nga nga ai; shi n-gun matsing ai Madu a mungga langai mi pyi n nga ai.

Ya hti ai gaw, Karai Kasang a Mungga rai nga ai.

 

Chyum Mungga Daw (2)

1 Korinhtu 6: 13-15, 17-20

Ya hti na gaw, Korinhtu masha ni hpang de, San Pawlu Shagun dat ai Laika Langai hta na rai nga ai.

Hpu nau ni e, Masha a hkum hkrang gaw n se n sa ai amu a matu n re ai sha, Madu a matu rai nga ai; Madu mung dai hkum hkrang a matu rai nga ai. Karai Kasang gaw Madu Hkristu hpe jahkrung sharawt la sai rai nna, anhte hpe mung shi a n-gun atsam hte jahkrung sharawt la na mi ai. Nanhte a hkum hkrang ni Hkristu a daw shan ni rai nga ai hpe nanhte chye chyalu rai nga myit dai; Madu Hkristu hte matut manoi nga ai wa gaw, nsa wenyi a lam hta Madu hte langai sha tai wa nga ai. 

Dai rai nna, n se n sa ai amu hpe koi kau nga mu. Masha galaw ai shut hpyit mara kaga hte gaw, tinang a hkum hkrang a shinggan e galaw nga ai; n se n sa ai amu galaw ai wa chyawm gaw shi a hkum hkrang hpe nan shut hpyit da wu ai. Ya nanhte a hkum hkrang gaw Chyoi Pra ai Wenyi sa nga ai htingnu rai nga ai hpe nanhte chye nga myit dai. Nanhte tinang hkum hpe madu lu ai n rai;  Nanhte a matu jahpu manu jaw ya nna mari da sai ni rai nga myit dai. Dai re ai majaw, nanhte a hkum hkrang hte Karai Kasang hpe shagrau sha-a nga mu law.

Ya hti ai gaw, Karai Kasang a Mungga rai nga ai.

 

Kabu Gara Shiga

Yawhan 1: 35-42

Ya hti na gaw, Yawhan a Laika hta na Madu a Kabu Gara Shiga rai nga ai.

Yawhan hte shi a sape lahkawng rau tsap nga ma ai rai nna, Yesu lai sa wa ai. Shaloi Yawhan gaw, Shi hpe mada yu nna, Yu mu, dai wa gaw, Karai Kasang a sagu kasha rai nga ai, ngu mu ai. Dai sape yan gaw shi tsun ai ga na nna, Yesu kaw hkan sa ma ai. Yesu gaw gayin yu nna, dai yan hkan sa ai hpe mu wu yang, nan hpa tam myit ta? ngu nna hkap san mu ai. Shan gaw, Rabai e, nang ganang nga n ta? ngu nna Shi hpe n htang san mu ai. Rabai a lahcyum gaw, “Sara” nga ai rai nga ai. Yesu gaw, sa marit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, Shi nga ai shara ganang re ai mung mu ma jang, dai shani tup Shi hte rau nga nga ma ai; dai ahkying gaw, shana maga ahkying mali daram rai nga ai.

Yawhan tsun ai ga na nna, Yesu kaw hkan sa ai yan hta na langai mi gaw, Simun Petru a kanau Andre rai nga ai. Dai wa gaw shi a kahpu Simun hpe jahpawt manap e mu hkrum nna, an gaw Messiah hpe mu saga ai, ngu nna shi hpe tsun dan ma ai. Messiah ga lachyum gaw, “Hkristu” nga ai, rai nga ai. Shaloi Andre gaw Yesu hpang de shi hpe woi wa wu ai. Yesu gaw shi hpe hkap yu nna, nang gaw Yawhan a kasha Simun rai nga ndai: ya kaw na nang hpe, Kehpa ngu nna shamying na ra ai: Kehpa a lachyum gaw, “Lunghkrung” nga ai, rai nga ai.

Ya hti ai gaw, Madu a Kabu Gara Shiga rai nga ai.

Matut Mahkai Ga

Facebook