Gasan : Tanghpre Jau ginwang, Ubyit mare lawk (2) na, Shadang Anthony Du Tang Ja a Gasan (1) hta - Masha langai mi makam masham gaw nnga ai, mai kaja ai magam bungli gaw grai galaw ai rai yang sumsing mungdan shang na kun?

Sumsing mungdan gaw yawng shang na matu Madu Yesu Hkristu dusa nna, anhte a mara ma hkra a matu udang hta si hkam, masum ya hpang bai hkrung rawt wa ai. Sumsing lamu de lung wa ai. Yawng a matu shara wa lajang ai. Rai yang yawng shang na matu rai nga ai. Raitim, nkam shang ai wa a matu chyawm gaw nchye ai. Kalang lang anhte hkrum yu na re. Anhte Christian ni zawn makam masham nnga ai ni anhte hta grau kaja, san seng chyoipra, mai kaja lam hta shachyen shaja rai, grai shakut ai ni hpe mu yu na re. Mai kaja ai lam a npawt daju Karai Kasang gaw dai ni hpe hkrak shaman ya na kam shut shara nnga ai. Mt.7:21 hta Madu Yesu tsun da ai, “Ngai hpe Madu e, Madu e, nga ai hte yawng mayawng gaw, sumsing lamu na mungdan hta shang lu na ma ai n rai: sumsing lamu hta nga ai, nye wa a myit hkan ai wa sha, shang lu na ra ai. nga nna, tsun shadum da nga ai. Shi madu ra sharawng ai hpe, myit ra Sharawng Let Kangka Gunhpai galaw shatup ni a matu sumsing mungdan gaw ga lahtum nshut rai nga ai. Anhte Christian ni mai kaja ai magam lam hta Karai Kasang ra sharawng ai, Madu Yesu matsun ai hte maren hkan sa hkan nang galaw shatup nna Mau Lajang da ai Htani Htana ban sa shara de du lu na matu shakut ga. ngu htai ya lu nngai.

 

Gasan (2): Christian hpung masha rai jang hpa majaw shagrit shanem ra ai kun?

Gumrawng gumtawng rai dum ai manghkang ni yawng a npawt rai nga ai. Npawt nhpang laika hta 3:1-14 hta rawng ai. Lucifer ngu ai Lamu Kasa ni a ningbaw ngu na Jan shing kang nhtoi zawn tu kabrim ai, ahkawn ahkang lu ai wa gaw gumrawng gumtawng myit rawng ai a majaw Karai a Lamu kasa ni hte gasat ai, shi mahtang Karai Kasang tai mayu wa ai. Rai dum ai dik htum chyalai rai mat ai, majan sum ai, sumsing mungdan kaw na htani htana gawt shapraw kau hkrum ai. Gumrawng gumtawng rai dum ai majaw rai sa. Chyoipra ai Mali ya shana Misaa Hkungga nawng ya ai shaloi Kabu gara shiga hti ngut ai hpang Jau gaw, masha ni a lagaw hpe kashin ya nna hpajet hte katsut ya ai. Madu Yesu shi a kasa ni hpe shi si na shawng shana e, kasa ni a lagaw hpe kashin nna katsut kau ya ai hpe myit dum ai. Madu Hkristu Yesu hkum nan dai zawn shagrit shanem ai rai yang shi a hpang hkan ai ni yawng gaw dai kasi hpe la let hkan shatup ra ai. Mt. 20:28 hta Madu Yesu tsun tawn ai, masha ni hpe galaw daw na matu shi du sa ai, masha ni galaw daw ai hpe hkam la na matu nre nga tsun da nga ai. Dai majaw anhte Christian hpung masha ni gaw kadai hpe rai tim manu shadan nna tsawra hkungga kanawn mazum na, galaw daw ra ai hpe myit dum mai nga ai.

Dai ni na ten hta gaw, shagrit shanem ai ngu ai tsawm ra mi prat sat lawat hta hkan nna masha law law ai nsharawng sai. Raitim, anhte galoi mung matsing da mai ai gaw masha ni hpe roi rip dang sha adip akrip di ai ni yawng, lagu lagut mya lu mya sha ai, masha ni hpe nshawp nkap galaw ai ni yawng hta gumrawng gumtawng ai myit masin hpring tup rawng nga ai.

Dai majaw anhte Christian ni, Madu Yesu gaw, Karai Kasang akasha majing rai nga ninglen, matsan mayan shangai wa ai, hkawhkam ni yawng a hkawhkam, ngalawng hta shangai wa ai. Ma chayangai ten kaw nna hpyen ni a lata kaw na hprawng ra ai, asak sumshi masum ning sha naw rai yang Udang ntsa e jen noi sat kau hkrum ai, ndai lam ni hpe myit sawn sumru kyu hpyi ai shaloi gaw Christu a hpang hkan ai anhte Christian ni mung dai Madu a kasi hpe la nan la hkan lang nna dai madu rau bai hkrung rawt awng padang de yawng, Karai a mungdan de du na matu rai nga ai. ndai hte hte Anthony Du Tang Jag a san hpe htai ya lu dat nngai.

Htai ya ai – Wajau Patrick Zinwa Brang Di

                   University of Santo Tomas

                   Manila, Philippines.

 


Matut Mahkai Ga

Facebook