Ga Htai: Yawng a shawng nnan na Christian Hpung mashani, Catholic hpung gaw Christmas poi hpe January shata 6 ya shani galaw ai lam labau hta ka tawn da ai. Dai hpang Christian hpung masha ni shara shagu htawt nawt hkawm mat wa ai shaloi tinang a buga hte htuk manu ai aten January shata kru ya hte ni dik ai nhtoi ni hta galaw lai wa ai lam mung chye lu ai. Christmas poi hpe hkrak galaw hpang ai wa gaw Roma Emperor Hkawhkam Constantine rai nna, December 25 ya shani, AD 336 ning hta rai nga ai. Roma Hkaw Hkam Constantine shi up hkang nga ai Roma mungdan ni yawng hta dai shaning kaw nna Christian ni Christmas hpe hkrit tsang ra ai lam nnga ai sha galaw lu ai hte galaw na ahkang mung lu la sai rai nga ai. Madu Yesu shangai wa ai poi hpe gaw Christian hpung masha ni kasa ni a prat kaw nna galaw hpang nga sai lam mung chye lu ai. Raitim ya na zawn December 25 ya shani hta Christmas Poi hpe Catholic Nawku Hpung masha ni yawng mungkan ting hkan lang galaw na matu gaw, Wa Sarabyin Julius langai a prat hta, matsun ndau shabra nhtoi masat dat sai rai nga ai.

Anhte Catholic Nawku hpung hta poi nhtoi law law nga ai hta March shata 25 shani hpe Lamu Kasa Gabriel Chyoipra ai Nu Maria hpe ga sa shana ai nhtoi ngu masat tawn da ai. Dai shani march shata 25 ya kaw nna December 25 yang rai yawng shata jahku tup rai nga ai. Shinggyim masha langai masha tai wa ai shaloi kanu a hkritung e shata jahku rawng nna shata shi ngu na hta shangai ai hpe yawng gaw chye na hkap la ga ai. Lamu Kasa Gabriel gaw Chyoi pra ai Nu Maria hpe march shata 25 ya hta ga sa shana ai English hte gaw Annunciation mung nga ai, ndai ga shana ai hpang shata jahku hpring ai shaloi, Madu Yesu shangai ai ngu hkap la ai hte December shata 25 ya shani hta Catholic Nawku Hpung gaw Christmas poi hpe galaw ai lam rai nga ai.

 

Htai ya ai – Wajau Patrick Zinwa Brang Di

                   University of Santo Tomas

                   Manila, Philippines.

 


Matut Mahkai Ga

Facebook