Hkungga tsawra ai nu wa hpunau ni e ndai lang gaw masha nkau mi galaw chye ga ai shat sha ngut ai hpang wa shalut ai gaw ladat n jaw ai rai yang hkam kaja lam hta hkra machyi shangun mai ai lam machye machyang hpe laika ka ai wa Kyi Lwin Myint tang madun hpaji jaw da ya ai hta na shamyet shanat let matut gam garan ya na n ngai.

Malu masha sha ngut shagu wa shalut chye ai masha ni hta nang lawm nga ndai kun? Dai gaw mang hkang rai nga a ni nga yang, wa shalut ai gaw mang hkang nrai nga ai, raitim nang lang ai wa shalut shingna gaw kaning re ai shingna rai nga lit dai kun ngu ai gaw ahkyak nga ai. Masha nkau mi malu masha sha ngut shagu wa shalut ai akyang nga ma ai, dai zawn rai galaw ai shaloi tinang lang ai wa shalut shingna gaw san seng ai re kun, n san seng ai re kun hpe atsawm sha jep yu na machye machyang n nga ma ai majaw hkrup mara shingna ni hte wa shalut lang nna n ra ang ai, wa machyi mang hkang ni hpe hkrum sha ra nga ga ai. Dai hpe gara hku sadi ra na lam matut hkaja mat wa yu ga.Ya sha tsun ai hte maren masha nkau mi hkrup mara re ai shingna ni hte wa shalut lang ma ai majaw wa machyi, wa baw kau ra, wa u ji bum re ai machyi shoi chyum lam ni hpe hkam sha ra ma ai re. Hkrup mara re ai shingna ni ngu ai hta mu ma mu, kawa chyen, pali daw ni hte hta shalut ai, shakum pa ni daw ye la nna shalut ai, layit gin lang ni gang ye la nna shalut ai, shan ju shingna dingsa ni hta la nna shalut ai, nkau mi rai jang samit hkin dang zawn re hpri mazen ni hte wa shalut rai galaw chye ai hpe tsun mayu ai rai nga ai.

Dai zawn rai hkrup mara shingna,samit ni hte wa shalut lang ai shaloi dai nsan seng ai shingna ni kaw nna ana kanu ni shang wa nhtawm wa uji bum ai ana ni byin wa shangun ai rai nga ai. Bai dai zawn n san seng ai, atsawm galaw shatsawm da ai lam n nga ai shingna samit ni hte wa shalut ai majaw n-gup kata shara ra hta a chyaw hkra kau ai, wa u ji ni achyaw hkra ai majaw myen ga hku (မဲခုိင္ပို္း) ngu shamying ai shakap gying ana kanu shang kap nna machyi shoi hpa hkam sha ra ai,tsi rung tsi gawk du ai masha ni, asak hkrat sum ai masha ni nga ma ai re. Bai wa lapran ni htan grau kaba ai wa shalut shingna, samit ni hte wa shalut ai a majaw wa ni ran wa chye ai. Wa ran wa ai shaloi gaw malu masha sha bang shagu wa lapran e tsat rawng taw ai. Shaloi malu masha ngam tsat taw ai majaw wa shalut ai, wa shalut ai majaw wa ran ai ndai zawn rai aten na wa ai shaloi wa latung sha,wa machyi wa nna wa baw kau ra ai de du mat wa ai.

Lama na anhte hta wa latung sha nna wa machyi, wa hku hku wa ai rai yang n san seng ai shingna, samit ni hte wa shalut,wa shalau ai lam ja ja n mai galaw na ga ai. Daini na ten wa latung sha ai, shing nrai lama ma a majaw wa ni hku hku, daw hten mat ai rai yang bai kapa ya lu ai tsi rung tsi gawk ni law law nga taw sai re majaw sa kapa la ai gaw kaja dik rai na re. Dai hku nrai wa hku hta malu masha tsat rawng taw shagu shingna hte shalau shaw taw ai rai yang wa pawt ni kaw nna nerve lasa tawng bum machyi ai ana du hkra byin wa lu nga ai.

Ning ngu tsun ai shaloi wa galoi hkum shalut ngu tsun mayu ai nrai nga ai grau nna shan, nga shat mai ni sha ngut ai hpang wa shalut ya na htap htuk nga ai. Raitim shawng ning nan n-gup krang,n-gup garu ai lam shawng galaw ya u, n-gup krang kau ngut ai hpang she wa lapran hkan tsat rawng taw ai maza mala, shan hkyep ni hpe san seng ai wa shalut shingna hte la shatsai kau ya ga. Wa hkamja lam hte htap htuk ai hku lak san galaw htuk shapraw dut ai wa shalut shingna ni gat seng ni hkan mari lang lu mai nga ga ai. Raitim nkau wa shalut shingna ni rai jang manu hkyamsa ai rai nna madang dep ai hku atsawm kabawng da ai lam n nga ai majaw bawm ai hte daw tsam loi ai re. Dai zawn re ai wa shalut shingna ni hpe mari lang hkrup yang mung wa lapran na maza mala ni shalau shaw kau lu ai lam n nga ai sha n-ga, wa shalut shingna pyi daw chyat rawng taw ai mang hkang ni byin chye nga ai. Dai majaw gat hkan na wa shalut shingna mari lang na rai yang manu hkyamsa ai hpe madung n-yu ai sha, hkamja lam hte htap htuk ai madang dep ai hku galaw shapraw dut ai shingna ni hpe mari lang chye nga ga. Wa shalut shingna ni kaw nna ana kanu shang kap ai hta na shakap gying ana kanu gaw hkrit tsang ra dik rai nga ai.

Rai yang chyalu galaw shapraw dut ai wa shalut shingna mari lang na yak hkyak ai masha ni a matu hpa hte wa shalut lang mai na ga ai kun, tsang shara n nga nga ai.Tsai hka lap gaw wa latung sha ana kanu ni hpe sat ma-nga kau ya lu ai wa hkamja lam hpe grai akyu jaw ya lu ai rai nga ai. Dai majaw moi na anhte a kaji kawoi ni gaw tsai hka gin lang hpe daw la nna wa shalut lang lai wa ma ai re.Tsai hka gaw wa uji na sai shamu shamawt lam hpe kaja shangun lu ai hte wa ngang ai akyu hpe mung jaw ya lu nga ai. Dai majaw myen ga malai hta (တမာတစ်ခက်သွားတစ်သက်) nga nna tsun tawn da nga ma ai. Daini na ten tsi jak rung nkau mi kaw nna htuk shapraw dut ai tsai hka n-gup krang tsi ni hpe mung mari lang lu saga ai rai nna loi loi hte akyu jashawn lang lu nga saga ai re.

Shingrai tsawra ai nu wa hpunau ni shan,nga shat mai sha ngut shagu wa shalut na htap htuk ai ngu ai hta mung n-gup garu, n-gup krang ngut ai hpang tinang a wa hta maza mala, shan hkyep ni ngam kap taw ai lam n nga, n-gup krang ai hte tsai mat ai rai yang gaw kaga mi wa shalut ya nra sana ga ai. Nra ang ai sha wa majoi n shalut ga, nrai jang wa shalut ai lang law nna wa ran, nru nra byin wa na, wa ran mat jang shani shagu malu masha ngam ni tsat rawng taw nna wa shalut ra ai mang hkang byin wa na ra ai. N-gup krang ai shaloi jum ntsin hte krang ya lu ai rai yang manam shagram nga ai hpe grau shatsai kau ya lu ai hte wa latung sha ana kaw na makawp maga hkyamsa lu na ga ai.Wa htu tsi lu lang na yak hkyak ai shara ni hta jum hte wa set lang ma ai re. Jum a wa hkamja lam jaw ya lu ai akyu hpe sarawun ni hkap la sai rai nna jum lawm ai wa htu tsi ni law law galaw shapraw taw sai rai nga ai. Ginchyum dat nna bai tsun ga nga yang - (1) n ra ang ai sha wa shalut ai lam n galaw ga. (2)Wa shalut na rai yang san seng ai, hkamja lam hte htap htuk ai wa shalut shingna shing nrai ri hpe sung lang ga. (3) Wa ukam hta hku hku ai rai yang wa shalut shingna hte shalau shaw ai lam hkum galaw u, hpa majaw nga yang tsat rawng taw ai lusha ngam shan hkyep ni npru lawm nang wa ai sha, kata de du hkra grau shang mat nna yet manam ai lam ni byin wa chye ai. (4) Jum ntsin hte n-gup krang ya nna wa hte wa uji ana kaw na makawp maga la lu mai na ga ai machye machyang lam ni hpe gam garan ya dat lu n ngai.

 

Ka Lajang ai – Saranum Julia Ndawng Ja Ing

                        RVA – Jinghpaw Nsen Shapoi Dap, Manila, Philippines.

 


Matut Mahkai Ga

Facebook