Asak galu hkra nga mayu ai wagaw malut hka yawm lu ai hpe mai byin ai made shayawm mat wa u,dawm kau lu ai gaw kaja dik rai nga ai.Hkamja dap ni sawk sagawn maram da lu ma ai hta shawng de hka yawm lu nna ya hka yawm lu jahkring kau ai masha ni gaw hka yawm lu ding yang rai nga ai masha ni htan grau nna asak galu ma ai lam sawk sagawn maram lam (17) hta na chye lu nga ai.Asak (60) ning lahta hka yawm lu ai masha ni gaw hka yawm nlu ai masha ni htan asak (60) ning a hpang asak sum lu ai lam (83%) grau law nga ai.Shawng de hka yawm lu ai raitim hka yawm dawm kau nna nga ai masha ni gaw hka yawm tsep kawp nlu ai masha ni htan (34%) grau asak kadun ai hpe maram da lu ai.Sawk sagawn maram lu ai lam langai mi hta hka yawm nlu ai masha tsa shadang(59% )ni gaw asak (80) ning lahta asak hkrung nga lu nna hka yawm lu ai masha ni rai jang tsa shadang ( 26%)ni sha asak (80) ning du hkra asak galu nga lu ma ai hpe mu chye maram da lu ma ai re.

Bai asak (40) ning n du shi ai laman hka yawm dawm kau lu ai rai yang hka yawm tsep kawp nlu ai masha ni hte asak galu madang bung ai nga nna tang madun da ya ai hpe mung hkaja la lu ai.Hka yawm lu nga ai asak kaba sai masha ni law malawng gaw asak kaba taw sai re majaw ya she hka yawm dawm kau tim hpa laklai ai akyu mi n hkam sha lu sana re nga nna myit sawn la shut chyenga ma ai.

N kaja ai kyang lailen langai mi hpe dawm kau na,la kau na ngu ai gaw galoi ten raitim hpang hkrat ai ngu n nga ai.Asak (40) ning sha n-ga galoi ten raitim hka yawm dawm kau lu ga ai rai yang dai hte gingdan ai akyu hpe teng sha hkam sha lu na re.Hka yawm hta lawm ai chemical gaw cell ni hpe hten za shangun kau ya lu ai rai nna hka yawm grau lu ai masha ni gaw hka yawm shadawn sharam rai lu chye ai masha ni htan asak grau kadun ai lam German sawk sagawn hpung ni hkap la da ma ai.Kaja wa nga yang galoi ten raitim malut hka yawm dawm kau dat ai hte rau hkamja lam akyu hpe kalang lata e nan lu la mai nga ai.Dai majaw asak kaba sai,lu ai tenmung na sai majaw hpa akyu mung hkam sha lu sana nre nga nna tinang hkrai myit sawn la shut taw ai hku nre sha aten shagu dawm kau na mai kaja ai ten hkrai rai nga ai hpe myit hta bang da let shayawm lu mat wa ga,dawm kau lu hkra mung shakut ga ngu n gun jaw tsun shadum dat mayu ai.

Hka yawm lu ai majaw byin wa lu shangun ai,hkamja lam hta hten za hkra machyi shangun lu ai lam ni law law rai nga ai.Hkum hkrang hten za gawng run lawan shangun ai,hkrit tsang ra dik ai ana ahkya hkum sumhpa ni law law malut hka yawm a majaw sha,hkam sha ra nna manu dan la ai asak hpe aten garai ndu,asak aprat naw ram ai ten hkrat sum mat shangun nga ai gaw anhte yawng a matu yawm hpa lam kaba langai rai nga mali ai.

Ndai malut hka yawm lu ai gaw lu ai masha ni hta sha hkra machyi shangun lu ai nrai nga ai.Makau na hka yawm wan hkut sama hpe marawp hkrup ai masha ni kaw du hkra,hkra machyi shoi chyum hkrum shangun lu nga ai hpe anhte dum chye nna sadi sahka na grai ahkyak la nga ai.Ga shadawn hkum gawng li ai kanu num ni hta rai jang ma brai hkrat mat chye ai,madang ndep ai,shata n-gu ai ma ni shangai wa chye ai.Dai zawn tinang a hkum gawng hten run mat wa ai sha n-ga tinang hka yawm lu ai majaw makau grupyin na masha ni hpe du hkra machyi shoi hpa byin shangun ai,tinang a dinghku masha ni hta hkra machyi shangun lu shangun nga ai hpe anhte a myit hta galoi mung bang tawn da nna dum chye nga ga.Dai lam ni hpe atsawm chye na da nna atsawm myit sawn shalawm yu ai rai yang hpa akyu mung n jaw ya lu ai malut hka yawm hpe nang naw matut lu taw nga mayu na ndai kun ?

Grau myit n pyaw hpa lam gaw nang lu shamawng dat ai hka yawm wan hkut sama a majaw hpa mung garai nchye na,hpa mara mung n nga ai,kung zet galu kaba,bawng ring wa na anhte a kashu kasha ni hpe hkra machyi shangun na hpe myit dat yu ga ai shaloi myit pyaw lam lu na ga ai kun ?Na a sak hkung prat a matu mai kaja ai lam rai nga lit dai kun sung sung li li myit yu na ra nga ga ai.Dai majaw malut hka yawm lu chye ai nu wa hpunau ni,manaw manang ni hpe kalang mi bai ja ja tsun shadum ya mayu n ngai gaw hka yawm wan hkut sama a majaw makau grupyin na masha ni hta hkra machyi ai lam yawm mat lu u ga,masha n nga ai shara,ga shadawn shinggan de pru nna lu ai zawn re ai akyang ni hpe lang nna yawng a matu mai kaja ai hku sak hkrung hkawm sa ga ngu ja ja saw lajin tsun shadum dat mayu n ngai law.

 

Ka Lajang ai – Saranum Julia Ndawng Ja Ing

                        RVA – Jinghpaw Nsen Shapoi Dap

                        Manila, Philippines.

                     

 


Matut Mahkai Ga

Facebook