Bawng ring lam ngu ai hpe anhte gara hku chye na hkap la da ga ai kun?Daini anhte a buga ginra ni hta NGO zawn re ai shinggyim bawng ring lam a matu garun ningtum hpung ni hku nna bawng ring lam hpe madung ladat shaw woi awn galaw nga ma ai hpe mu mada lu ga ai.Bawng ring lam ngu ai hta nchye nchyang,kaji kadun madang nem ai kaw nna chye chyang kung kyang galu kaba wa ai maga de du wa hkra makam masham,htung hkying hte hpaji lam,makau grupyin hte mung masa,sut masa lam ni rawt jat galu kaba wa hkra gaw sharawt ,woi awn galaw ai magam bungli ni rai nga ai.

Tsun mayu ai gaw n hkamja ai kaw na hkamja wa hkra,hten za nga ai makau grupyin kaw nna tsit lali tsawm htap ai makau grupyin byin wa lu hkra,tara rapra ai lam n nga,n ngwi npaw,nsim nsa rai nga ai mung masa kaw nna tara rapra,ngwi pyaw simsa ai mung masa de du wa lu hkra,karai kasang anhte hpe jaw da ya ai n-gun atsam lagaw lata,bawnu machye machyang,ja gumhpraw nhprang sut rai ni hpe jai lang let zai ladat kaja shaw,masing masa kaja ni jahkrat nna ta tut hkrang shapraw galaw sa wa ai magam bungli lam ni rai nga ai.

Dai majaw bawng ring lam hpe gaw sharawt sa wa na gaw anhte a buga ginra ni hta project jahkrat ya nna, garum madi shadaw ya nga ai NGO ni hkrai sha nrai nga ai.Ya galaw ya byin wa lu na mung nrai nga ai.Bawng ring ai madang de du wa lu na matu aten jaw ra ai,matut manoi rai shakut ra ai.Anhte nang ngai marai hkum shagu,kun dinghku shagu,amyu baw sang shagu,mare buga shagu,mungdan masha shagu shang lawm gaw sharawt ra ai magam bungli rai nga ai.

Hpa majaw bawng ring magam bungli galaw ra ga ai kun nga yang shinggyim masha a lam atsawm sha azin ayang hkaja yu ai hpaji ninghkring ni tsun ai gaw masha langai mi hta hkum hkrang ,wenyi,myit masin hte shinggyim uhpung uhpawng kanawn mazum lam nga nna daw mali garan ginhka da lu ai nga ma ai.Teng nga ai bawng ring lam ngu ai hta ja gumhpraw ,arung arai sut gan ni lu su,madang tsaw,nga mu nga mai na lam sha nrai,hkum hkrang hkam kaja lam mung ra ahkyak nga ai.Hkum hkrang hpe n-gun byin shangun lu ai malu masha ni sha ya na ra nga ga ai zawn anhte wunpawng amyu sha ni gaw Christian makam masham hte nga sa ai ni law nga ga ai majaw wenyi hkam kaja na matu mung ahkyak kaba langai rai nga mali ai re.Wenyi hkam kaja lam a matu akyu hpyi ra ai ,tengman ding hpring ai hte mai kaja ai amu magam ni hpe galaw ra ai,karai a sak hkrung ai mungga hpe hti sumru hkan sa let n-gun la ra ai,myit masin tsawm htap ai hte tsawra matsan dum lama ai magam ni hpe galaw hkan sa let sak hkrung hkawm sa ra ga ai.

Kaning re ai amu magam lam hta raitim nang myit masin tsawm htap kaja na ahkyak nga ai.Tsun mayu ai gaw nang law law nlu galaw ai,nlu jaw ai raitim na a yaw shada ai myit,tsawra myit tsawm htap ai rai yang wenyi hkam kaja lam hpe lu la na,wenyi nshat hpe mahkawng da lu na rai nga ai.Bai myit hkam kaja na matu laika hti ra ai,laika ka ra ai,myi hte mu mada nna sharin la chye ra ai,masing masa jahkrat nna bungli galaw hpang chye ra ai,ndai lam ni gaw myit hkamja lam hpe jaw ya lu ai bawng ring lam ni rai nga ai.

Matut nna shinggyim uhpung u hpawng kanawn mazum bawng ring lam ngu ai hpe bai yu dat yang anhte shinggyim masha ni a sak hkrung kanawn mazum sa wa ai hta ahkyak rai nga ai,shinggyim uhpung uhpawng kanawn mazum lam bawng ring wa na matu shada chye na myit tau ya hkat ya ra ai,daw jaw chye ra ai,manang wa a hkam sha lam ni hpe chye na ya lu ai rai yang shada da hku hkau kanawn mazum lam hta bawng ring lam lu la mai nga ga ai.Ya sha tsun mat wa sai bawng ring lam ni gaw anhte a hkum hkrang hta na pru wa ai bawng ring lam ni rai nga ai.

Dai majaw langai hte langai matut manoi rai taw nga ai rai nna langai mi hta ra rawng jang kaga langai mi hta mung ra rawng wa chye nga ai.Ga shadawn myit masin hta ra rawng jang hkum hkrang hkam kaja lam,kanawn mazum lam,wenyi lam ni hta mung matut manoi rai ra rawng ai lam ni byin lawm wa lu nga ai.

Shingrai hkum hkrang,wenyi,myit masin ni yawng bawng ring wa lu na matu hkam kaja ra ai,shingbyi shara dum nta ,lu na sha na hte bu hpun palawng ni ra nga ai.Marai hkum shagu,kun ding hku shagu,amyu baw sawng shagu,mare buga shagu,mungdan masha shagu,sut masa lam hta rawt jat wa na ladat lam ni gyin shalat gaw sharawt let ta tut hkrang shapraw galaw sa wa na ra ai.Dai zawn gaw sharawt sa wa lu na matu gaw machye machyang kung hpan ra ai,kaja ai hte n kaja ai hpe ginhka la chye nhtawm n kaja ai hpe koi kau da nna kaja ai hpe lata galaw chye na ra ai.

Shingrai tsawra ai nu wa hpunau ji nban ni e anhte gaw karai kasang a kashu kasha ni rai nga ga ai majaw lam shagu hta karai kasang hpe kam hpa manoi manat let karai kasang a mungga hte maren shi a ra sharawng ai lam hta sak hkrung hkawm sa nga nna karai kasang jaw da ai ahkying aten,arung arai sutgan,n-gun atsam hpaji machye machyang ni hpe jai lang let bawng ring lam hpe gaw sharawt sa wa ga ngu Jade Land Journal hta tang madun da ya ai machye machyang lam ni hpe shamyet shanat let matut garan kachyan ya dat lu n ngai rai.

Ka Lajang ai – Saranum Julia Ndawng Ja Ing

                      RVA – Jinghpaw Nsen Shapoi Dap

                         Manila, Philippines.

 

Page 1 of 4

Matut Mahkai Ga

Facebook