Hkungga tsawra ai Nu Wa hpu nau ni, Laika ka Sara Tsa Magawng ka lajang da ai jinghpaw labau ginrung laika buk hta na Jinghpaw Ngu Ai Mying Lu La ai lam hte seng nna, matut gam garan dat n’ngai.

Nu Wa hpu nau ni, Shan Htoi La yan Jan Nang shayi a aru arat ni rai nga ai, shadang sha ni marai (6) hta na, kaji htum kanau rai nga ai, Sumpawng Yaw gaw anhte jinghpaw labau a ningpawt nan rai nga mali ai. Ndai sumpawng yaw hpe jinghpaw labau hta, Sumpawng Yaw, shapawng Yaw, Shawng na Pawng Yaw, Pawng Yaw Kaba ngu ai hku nna, Ti-nang ni hkuk manu dum ai hku nna gawn tsun ma ai rai nga ai. Anhte a Jinghpaw buga ginra kau mi hkan na jinghpaw kau mi gaw, “Shapawng Dangmang “ngu nna mung gawn tsun ma ai lam chye lu nga ai. Shanhte tsun ai Shapawng Dangmang gaw, Sumpawng Yaw hpe ngu ai rai kun? Shing n’rai, kaga hpe ngu ai rai kun? ngu ai lam hte seng nna gaw, a’tsawm garai n’sagawn la lu nga ma ai.

N’dai Jinghpaw labau gawn tsun ai masha nkau mi rai jang, Jinghpaw ngu ai mying hpe majoi Sha-u a shawng daw de jai lang ma ai lam chye lu ai. Ndai hku rai jang gaw, Jinghpaw labau Mungga madang grit mat ai hku rai mat nga ai, nga nna mung tsun da nga ai. Hpa majaw nga jang Npawt gawn nlu ai zawn bying nga ai masa rai nga ai. Bai, masha kau mi rai jang gaw, Jinghpaw ngu ai gaw, Masha nga ai re: nga nna, mung tsun nga ma ai. A…ra Law…rai sa. Shanhte tsun ai grai kaja sai. Raitim, dai kaja, grai jaw ai labau mungga gaw, Anhte Sumpawng Yaw a aru arat ni a matu san san sha rai na mali ai.

U-Raw-Pa Dan na Ja- Ma-Ni masha wa hpe, “Nang Jinghpaw rai n’dai” ngu tsun jang, dai Ja- Ma-Ni masha wa gaw, Ngai Ariyan (Aryan) aru arat Ja-Ma-Ni masha she rai n’ngai. Jinghpaw ngu ai gaw n’chye n’ngai, nga nna tsun wa na gaw teng sha rai nga ai. Hpa majaw nga jang, Nang jinghpaw re ai hpe nrai dai, myen she rai ndai ngu jang kadai mung hkap la lu na nrai nga ai. Gadai mung tinang a sai gaw sai sha re. Dai hte maren ti-nang a htunghkring gaw tinang na sha rai nga ai. Dai majaw, Ndai labau maumwi hta mung, Jinghpaw labau ginrung hku nna gaw, Sumpawng Yaw a aru arat ni chyu sha Jinghpaw rai nga ga ai hte maren, Sumpawng Yaw a aru arat ni yawng mung Jinghpaw rai nga ga ai ngu ai hku nna, a’ngang akang ka da ai hku rai nga mali ai.

Dai zawn, Sumpawng Yaw a aru arat ni yawng Jinghpaw rai nga ga ai, ngu ai mying shing teng let nga pra law htam wa nga masai. Sumpawng Yaw mung prat asak ram wa magang sai rai nna, Mahtum Mahta Shayi sha hte kung dinghku de na matu myit hkrum ya masai. Makin jinghku ni yawng myit hkrum sai hte rau, shan gaw mayaw dinggaw de masai. Sumpawng Yaw hte Mahtum Mahta Shayi yan gaw, Shayi shadang sha ni law law shaprat ma ai da. Shan a shayi shadang sha ni law law nga ai hta na, Shayi sha ni a lam hpe gaw, labau hta gawn tsun da ai lam n’nga malu ai. Shadang sha ni yawng Marai (6) a lam hpe rai jang gaw, grai dan leng ai hku nna, dingtawng dingyang gawn tsun da nga ma ai.

Sumpawng Yaw hte Mahtum Mahta shayi sha yen a kasha ni hta na, shadang sha marai (6) ni gaw Ma Gam kawn Ma Yaw du hkra rai malu ai. Ma Gam wa gaw, Nungmi ni a kaji Daju, Manaw bai rai jang, Hkamaw hkaman, Kadu-kanan ni a kaji daju, Ma La gaw, Lisu ni a kaji daju, Ma tu mahtang gaw, Hkang, Na Ga ni a kaji daju rai nga ai. Ma Tang mahtang gaw, Tangbau Tang, Lawngwaw, Lachik ni a kaji Daju hte Ma Yaw bai rai jang, Pawng Yaw, Jinghpaw hte Zaiwa ni a kaji Daju ni rai nga mali ai. Ndai Pawng Yaw, Jinghpaw hte Zaiwa ni a kaji Daju rai nga ai Ma Yaw hpe Tingli Yaw Htung ngu nna mung tsun shaga nga ai hpe chye lu ai.

Ya sha tsun lai wa sai, Sumpawng Yaw a aru arat ni gaw, Monggo dan ginra hta hkai lu hkai sha, remlu remsha , htaw wa htaw sa, ndai zawn re ai magam bungli ni hpe galaw let, tinang a asak pu kan bau let galu kaba nga pra ma ai lam jinghpaw labau ginrung hta madi madun da nga ai. Nu Wa ni, ndai monggo ga ngu ai shara ginra gaw, moi na anhte a Jiwoi Jinghpaw, Joiwa Dumsa ni hku nna, “Ka-ang Shing-ra Ga” ngu nna, shamying da ai lam, a’tsawm sha sagawn la lu ai hpe tsun ai rai nga ai. Dai majaw, sumpawng Yaw a aru arat rai nga ai, Jinghpaw ni yawng hpe mung “Ka-ang La ni” ngu nna, shamying ai lam chye lu ai. Hpa majaw nga jang, dai ten hta pra ang ai, Sumpawng Yaw a aru arat ni yawng gaw, dai “Ka-ang Shing-ra Ga” kaw sha nga pra nga ai re majaw, ya na zawn shamying ai lam re nga nna tsun da nga ai. Dai majaw Sumpawng Yaw a aru arat ni rai nga ai “Ka-ang La ni” gaw Ka-ang Shing-ra ga hta galaw lu galaw sha, galu kaba mayat maya sut su nga mu nga mai nna, nga ma ai lam labau hta madi madun da hpe chye lu ai rai nga ai.

Nu Wa ni, ya sha na la lu sai Sumpawng Yaw a aru arat ni gaw, dai Ka-ang shing-ra Ga kaw sha nga kaba nna, sut su mayat maya nga masai re majaw, shanhte hkum shahte mung a’rawng la chye nga ma ai. Kaga ginra ni hkan nga ai ni hta na, loi grau nna, myi hpaw, sut su nga ai ni re nga nna, loi reng ai ni mung rai nga ai. Dai zawn garu kachyi nga ai lam hpe Sumpawng Yaw a aru arat ni nga ai Ka-ang shing-ra Ga a htingbu htingbyen ni gaw, na chye lu masai. Sumpawng Yaw a aru arat ni rai nga ai, Ka-ang La ni gaw, nga sat nga sa lam hta galai sha wa sai rai nga ai.

Nu Wa ni, Monggo dan ngu shamying ai, “Ka-ang Shing-ra Ga” ngu ai ginra hta, Sumpawng Yaw a aru arat ni rai nga ai, “Ka-ang La Ni” gaw, galu kaba mayat maya sut su nga mu nga mai nna nga wa masai lam na la lu saga ai re. Daizawn, Ka-ang La Ni gaw, sut su nga mu nga mai wa sai re majaw, “Ante gaw, Ring chying myi hpaw, sut su nga mu nga mai saga ai law” nga nna ninglaw jahtau garu ma ai da.

Daizawn nga nna, Sumpawng Yaw a aru arat ni Ninglaw garu ai hpe na la mu la sai, grup-yin hkan nga ai Tibet hte Monggo masha ni gaw, “Ring Chying Myi Hpaw saga Ai” nga nna, Ninglaw garu ai Ka-ang La ni hpe, dai daram ram ninglaw ai gaw ngu nna, “chying Hpaw Ni” ngu shamying ya manu ai da. Makau grup yin na htungbu htingbyen ni daizawn “Chying Hpaw Ni” ngu nna, shamying ya sai hpe, Sumpawng Yaw a aru arat ni rai nga ai Ka-ang La ni gaw grai ra sharawng ma ai da. Dai majaw, shanhte na shanhte hkrai mung, “CHYING HPAW NI RAI GA AI” nga ma ai da.

Ndai zawn, “Chying hpaw Amyu Rai Ga Ai” nga nna gawn tsun ginlen hkat wa let, ladaw shaning, ahkying aten ni na wa sai hte rau, shara ginra langai hte langai shai ai hta hkan nna, Chyinghpaw, Shinghpaw, Dumhpaw, Nhpaw, Jumhpaw ngu ai hku nna, n’sen manawng, loi loi shai ai lam ni nga wa sai rai nga ai. Ya nazawn shai ai lam gaw, lai sai shaning hkying hku na, na sana rai nga mali ai. Dai zawn na sai shaning law law ni hta, Chying Hpaw Ni ngu ai hpe nsen manawng shai nna, tsun shaga lai wa sai rai nga ai.

Madu a shaning AD 1800 jan 1900 hkran maga de du kap wa ai ten hta gaw, Manmaw ginwang hte Sam mung lahta daw na buga ginra n’kau mi de, sinna mungdan de na Hkristian Sasana Jau, Sara ni du shang wa sai re majaw, sasana magam hta grau nna masan sa na hte Jinghpaw myu sha ni a matu nga nna, Jinghpaw laika hpe sawkgyin shalat ya ai hte dai laika hku nna gaw, Jinghpaw, Jinghpaw Amyu ngu, grai htap htuk manu ai hku shamying la nna, tsun ginlen jai lang lu saga ai rai nga mali ai Nu Wa ni. Mi shawng e tsun shaga ai nsen, Chyinghpaw, Shinghpaw, Dumhpaw, Nhpaw, Jumhpaw ngu tsun ai kawn nna, Sinna mungdan de na sasana magam gun ni hku nna, anhte a matu htuk manu ai nsen , Ga si hte Jinghpaw Amyu ni ngu nna tsun shaga wa ai ya daini du hkra grin nga lu saga ai rai nga ai.

Bai Masha kau mi gawn tsun ai rai jang gaw, Jinghpaw, Chyinghpaw ngu ai gaw, Sha-u hkyet ai ten hta Chyingtawt kata kaw nna hpaw malang pru ai re majaw, “Chyinghpaw ” ngu tsun shaga wa ai kawn nna, “ Jinghpaw ” ngu ai re: nga nna, hkai tsun nga ma ai lam chye lu ai. Nkau bai rai jang gaw, Majoi Sha-u a hpang daw na shinggyim masha ni yawng hpe, Jinghpaw ngu na ang wa nga ai, nga nna mung bai tsun wa masai.

Nu Wa ni, ndai Jinghpaw ngu byin pru wa ai hte seng nna, le ra wa gawn tsun ai she jaw ai zawn zawn, ndai wa gawn tsun ai she jaw ai zawn zawn nga nna, hkam sha lu ai ni mung nga na re. Hpa majaw nga jang, Sumpawng Yaw a aru arat ni gaw, Ka-ang shing-ra ga ngu ai kaw nga nna, galu kaba mayat maya, wa ai re majaw, galai shai ai prat hpe lu la ai, lawt lu ai masat labau re ngu hkam la ai sha n’ga, Anhte gaw, Ring Chying myi hpaw, sut su nga mu nga mai saga ai law, nga nna, ninglaw jahtau garu ai majaw, Chyinghpaw ni ngu ai mying hpe lu la ai lam re hpe jinghpaw labau ginrung laika buk hta gawn tsun da nga ai lam chye lu ai.

Dai majaw, ya na zawn Jinghpaw ngu shamying ai gaw, Sumpawng Yaw a, aru arat ni a Ninglaw Ga, Ring Chying nga ai kaw nna, Chying Hpaw, Jinghpaw ngu nna, amying shing teng lu la sai rai nga ai law.

 

Shamyet shanat – Jinghpaw Labau Ginrung Laika Buk (Tsa Magawng)

Ka Lajang ai –   Mama Rose Angeline Maran Nang Doi

                          RVA – Jinghpaw Nsen Shapoi Dap

                          Manila, Philippines

 

 

 

Page 1 of 2

Matut Mahkai Ga

Facebook