Wa Sarabyin Francis gaw, Catholic nawku hpung a (266) ngu na Kasa Petru a gawng malai tai nga ai, Sagurem, Wa Sarabyin mung rai nga ai. Shi gaw, Artentina myo rai nna, Kawa Maria Jose Bergoglio hte kanu Regina Maria Sivori yen kaw nna, 1936 ning, December shata (17) Ya shani, Argentina mungdan, Buenos Aires ngu ai shara hta shangai chyinghkai wa ai rai nga ai. Shi a mying gaw, Jorge Mario Bergoglio rai nga ai. Kanu yan kawa gaw, Italia bu htawt hkawm masha rai nna, Argetina mungdan hta sa du shanu machyu nga ai lam rai nga ai. Wa Sarabyin shannau ni gaw, marai (5) rai nna, la kasha masum, hte numsha lahkawng rai nga ai. Ndai zawn rai, Kanu yan Kawa a shingnip npu hta nga let, mungkan hpaji ni hpe sharin hkaja la ngut nna, 1958 ning, March shata 11, shi a asak (21) ning jan hta, the society of Jesuit ngu ai, Jau Wuhpung de shang let, Karai hpaji ni hpe sharin hkam la hpang wa sai. Dai hpang chile mungdan kaw e shingyim wuhpung wuhpawng hte htunghking lam yan hte seng ai hpaji ningli hpe sa sharin hkaja la ai ngu ai hpang, Argentina mungdan de bai nhtang wa ai. 1960 ning, March shata 12 ya shani gaw, poverty, chastity and obedience ngu ai, matsan mayan ai, san seng ai hte madat mara ai ngu ai shawng ningnan na ga sadi hpe hkamla sai rai nga ai. Dai hpang, 1963 ning hta, Philosophy ngu ai myit sawn hpaji janmau hpe Colegio de San José ngu ai College kaw na hkamla lu sai. Dai hpang 1964 hte 65 hta gaw, Immaculate Conception ngu ai College hta myit sawn hpaji sharin Sara magam gun lai wa ai. 1966 ning hta gaw, dai hpaji hpe sha, Bunno Aires na, Colegio Del Salvatore ngu ai jawng hta myitsawn hpaji hpe sha sharin ya lai wa sai.

1967-70 du hkra gaw, mi shi myit sawn hpaji sharin hkaja la ai, College rau bga aum Colegio de San José ngu ai kaw sha, Theology ngu ai chyum hpaji hte seng ai lam hpe janmau gup la lu sai rai nga ai. Ndai zawn rai nna, mungkan hpaji hte karai hpaji ni hpe sharin hkaja la nga let, 1969 ning December shata 13 ya shani gaw, Wasaradaw kaba Ramon Jose Castellano a lata hta jau tai aya hpe hkamla sai rai nga ai. Dai hpang, 1970 hte 71 ning hta, Spain mungdan na, University of Acala de Henares ngu ai dakkasu hta, matut hpaji sharin hkamla lai wa sai. 1973 ning, April 22 ya shani hta final profession ngu ai, Jesuiuts jau wuhpung a hpang jahtum ngu na ga sadi hpe hkam la lai wa sai rai nga ai. Dai hpang Argentina mungdan de bai nhtang wa let, Myit tsawn hpaji hte chyum dakksu hta lithkam Jau hku nna magam gun lai wa sai. Ndai zawn, magam gun nga yang, 1973, july 31 ya shani hta, Argentina mungdan, Jesuits jau wuhpung a lithkam Jau kaba magam lit hpe shatsam hkrum let, 6 ning tup magam gun lai wa sai rai nga ai. Dai magam gun ngut ai hpang, Colegio De san Jose ngu ai Collage hta, 1980-86 ning du hkra, lithkam jau magam hpe bai shatsam hkrum lai wa ai. Ndai zawn rai nna, Wasabyin shi a magam bungli shagu hta kang ka let shakut shaja ai lam ni hpe mu lu ai majaw, Buenos Aires a Saradaw Kaba Cardinal Antonio Quarracino kaw nna, shi a magam hta shaga la let, shi hte rau nawku hpung a magam ni hpe shakut nga sai rai nga ai.

Dai zawn rai nna, 1992, May shata 20 ya shani gaw, ya Madu hta ban sa yup pyaw mat wa sai rai nga ai, San pra ai Wa Sarabyin Yawhan Paulu (II) kaw nna, shi hpe Auca a Saradaw hte Bouenos Aires ningtau saradaw aya hpe jaw ya sai rai nga ai. May shata 20 ya shani hta e, shi a Saradaw ting nyang ap ai lamang hpe Saradaw jawng hta sha Cardinal kawn ap jaw ya sai rai nga ai. Ya na zawn, sagurem lit magam hpe gun hpai shakut nga let, Carinal Quarracino nnga mat ai hpang, 1998 ning, feb 28 ya shani hta, Buenos Aires a ginwang up Saradaw kaba lit magam hpe gun hpai sai rai nga ai. Ndai zawn rai nna, ginwang up Sagurem lit magam gun hpai ai (3) na ai hpang, ya nnga mat wa sai, San Pra ai Wa Sarabyin Yawhan Paulu (2) kaw nna, shi hpe, Cardinal aya bai dang dat sai rai nga ai. Shi a nhkring nsa sasana magam lam hta shakut shaja ai, wenyi lam yan hta n gun dat ai lam ni a majaw, shi a lam gaw, Latin America dan hta kajai gumhkawng wa sai. Ndai zawn, 2002 ning kalang hte 2008 ning hta, kalang numdaw bai Argentina Saradaw wuhpung a ningbaw lata dang da hkrum sai. Anhte yawng chye chyalu rai nga sai, lai wa sai 2005 ning, San pra ai Wa Sarabyin Yawhan Paulu (2) nnga mat ai hpang, Wasarabyin Benedict XVI hpe, Sarabyin lata dang ai shaloi mung, sa dung shang lawm lai wa sai rai nga ai.

          Wa Sarabyin shi a buga rai nga ai, Boeno Arise a lithkam Sagumrem magam hpe gun hpai nga ai ten, Jau ni hte yu maya hpung masha ni, lata gindun nna, nawku hpung a magam lam hta shakut shaja ai, matsan jam jau hkrum ai ni hpe myit du, myit shalawm let, shanhte hpe lakawn lanawn ai magam hpe n gun shadat ai, hpung masha ni hte ahkum dinglum ni ni htep htep rai nna, woi awn lakawn lai wa sai rai nga ai. Shi a labau laika ni hta hti yu yang, dai shi a Saradaw ginwang hkan na Nawku hpung masha ni, shi a jawngma manang ni, hku hkau ai manaw manang ni a hkamsha lam hte shi a ntsa mu mda ai lam ni hpe hpaw tsun dan ai lam ni mu lu nga ai.. dai lam ni gaw… Wa Sarabyin gaw, kadai hpe mung hku hku hkau hkau maren mara tsun shaga chye ai, shi gaw, ting kyeng mawdaw, Taxi n jawn ai, mungchying sha ni jawn ai mawdaw kaba ni sha jawn ai, dai majaw, mung chying sha ni a sak hkrung nga pra lam hpe grau chye na hkam sha ya lu ai nga ai. Shi a manang ni tsun da ai hta gaw, shi gaw, grai sumnung shingdi ai hte sak hkrung hkawmsa ai wa re nga da ai.

Ndai zawn rai nna, shi a Saradaw ginwang na hpung masha ni a matu, grai kam hpa shara, rai nga ai ten, 2013 ning, Feb 28 ya shani, Wa Sarabyin Benedict XVI, Sarabyin lit magam kaw nna, hkringsa mat ai hpang, March 13, 2013 hta gaw, 1.2 Billion, Wan hkying mi jan re ai Catholic Nawku hpung hpe woi awn taw nga ai gaw, daini du hkra rai nga ai. Wasarabyin a mying gaw, Jorge Mario Bergoglio raitim, San francis Assii a mying hpe la let, shi zawn rai nna, maku grup yin shingra tara hpaw tsawra makawp maga ai, matsan mayan hkam, shagrit shanem let, nawku hpung a magam hpe woi awn na ngu ai yaw shada lam hte hpawn rai nna, Francis ngu myit la let, Sarabyin a lit magam hpe gun hpai ai rai nga ai. Bai nna, Wa Sarabyin a lak lai ai lam gaw, shi hpe Sarabyin lata dang da ngu ai hpang, San peter pa kaba hta ala nga ai, Mungdan shara shagu na du zup nga ai hpung masha ni hpe, shakram ai lam gaw, tsawra ai nawku hpunau ni yawng, ngwi pyaw ai shana de maga rai u ga ng anna shawng ahkum alum shakram lai wa ai rai nga ai.

Bai nna, Nawku hpung masha ni hpe tsun ai hta, Nawku hpung a htung tara nga ai hte maren, Wa Sarabyin Benedict hkringsa mat ai majaw, Sarabyin byin bai lata ra ai, dai majaw, nye a manang Cardinal ni hku nna, mungkan shara shagu na, Cardinal ni hpe shaga let, Sarabyin lata dang da lam ai galaw ai hte, anhte ndai kaw du zup nga ga ai. Nye a manang ni mung, ngai hpe ndai sagurem magam lit shatsam ai hte Karai Wa jaw ya ai lit magam rai sai majaw, ngai hkap la sai. Raitim, ya ngai nanhte Nuwa hpunau ni yawng hpe, rai n shaman shi yang, ngai hpe kyu hpyi ya marit ng anna, san peter pa kaba hta du hpawng nga ai hpung masha ni hpe hpyi lajin lai wa ai. Ndai lam gaw, grai shagrit shanem ai, Wa Sarabyin Francis a myit masa rai nga ai. Yan a zawn, Wa Sabyin lata la hkrum sai hpe na lu ai, Argentina mungchying sha ni a myit hta, tsun nma hkrai kabu ai lam ni anhte shiga ni hkan, shi a labau laika man ni hkan mu lu nga ga ai re. Wa Sarabyin tai wa ai hpang, shi a sagu hpung masha ni hpaw tsun ai hta, anhte a Saguremwa, Roma mungdan hta daju let, mungkan ting na saguhpung masha ni hpe woi awn hkawmsa ra sana re hpe kabu lawm ai raitim, anhte a makau na, saguremwa htawt mat wa ai majaw gaw, myit hta amyu mi nga gaw hkamsha ga ai nga nna tsun hpaw da nga ma ai re.

Dai zawn rai nna, Wa Sarabyin Francis gaw, hkringsa mat sai rai nga ai, Wa Sarabyin Benedict XVI a n ngut kre shi ai Nawku hpung a magam lit ni hpe matut gun hpai taw nga sai rai nga ai. Wa Sarabyin gaw, maga mi de, tsaw tsan ai mungdan hkan na hpung masha ni hpe mung, myit du let sa du gawan ai lam ni mung galaw lai wa sai rai nga ai. Shi hkaw dung nga ai, Vatican kaw nna, shinggan mungdan de hkawmsa ai hkrun lam ni hta.. Brazil mungdan Rio De Jeneiro kaw galaw ai mungkan ramma hpawng kaba de, 2013 ning July shata 22-29 du hkra sa du gawan lai wa sai rai nga ai.2014 ning hta gaw, Iserel, Jordan, palestine de, May shata 24-26, Dingda korea mungdan de August 14-18, Albnia de, Sep 21 ya hta sa du gawan lai wa sai. Bai Nov 25 ya shani mung, Pyintit mungdan de, Nov 28-30 ya shani du hkra gaw, Turkey mungdan de sa du gawan lai wa sai rai nga ai. Bai 2015 ninng, Jan 13-19 ya shani du hkra, srilanka de Philippines mungdan de sa du gawan lai wa sai. June shata 6 ya shani hta gaw, Bosnia hte herzegovia mungdan de. July 5-13 ya shani du hkra, Bolivia, Ecuador the Paraguay mungdan de, sep 19-27 du hkra, cuba the America mungdan de, nov 15-30 du hkra Kyena, Uganda hte cegral arican republic mungdan de sa du gawan lai w asai rai nga ai. Bai 2016 ning, Feb 12-18 du hkra gaw, Cuba hte Mexico mungdan de, april 16 ya shnai gaw, Greece mungdan de, June 24-26 du hkra gaw Amenia mungdan de, july 27-31 du hkra gaw, Polang mungdan de, Sep 30 – Oct 2 ya shani du hkra gaw, Georgia the azebijan mungdan de, Oct 31 the nov 1 ya shani hta, Sweden mungdan ni de sa du gawan lai wa sai rai nga ai. Bai daining lamang hta gaw, lai wa sai april 28-29 hta Egypt mungdan de, may 12-13 hta Portugal mungdan de, sep 6-10 du hkra gaw, Colombia mungdan de sa du galai wa sai rai nga ai. Ya anhte a Myanmar mungdan de gaw, du wa na, Nov 27-30 du hkra gaw, anhte Myanmar mungdan de sa du gawan na rai nna, Bangadesh mungdan de gaw, Nov 30 – nov praw 2 ya shani du hkra sa du gawan na rai nga ai.

Ka Lajang ai – Sara Joseph Maru La Nan

                          RVA Jinghpaw Nsen Shapoi Dap, Manila, Philippines.

 

Page 1 of 5

Matut Mahkai Ga

Facebook