Shing gyim asak hte seng nna galoi mung makawp maga ai Vatican a hkap la hkan sa ai lam hpe Geneva hta galaw nga ai UN mungkan wunpawng rap daw shingyim ahkaw ahkang hte seng ai hkumra hpawng hta, UN mungkan wunpawng rap daw hte seng ai Vatican ding run dat kasa Saradaw kaba Ivan Jurkovic kaw nna bai kahtap tsun shana dat ai rai nga ai.

UN mungkan wunpawng rap daw hte seng ai Vatican ding run dat kasa saradaw kaba tsun ai hta, “Shing gyim asak ngu ai gaw shangai wa ai aten kaw nna si ai aten du hkra chyoi pra san seng ai lam rai nga ai, ru hka amu tawt lai ai bawng masha langai hta pyi asak hkrung lu na ngu ai kadai mung dawm la kau ya nlu mai ai ahkaw hkang shi hta nga nga, nga nna Wa Sarabyin Fracnsi tsun lai wa yu ai lam hpe mung, lai wa sai bat masum ya shani saradw kaba kahtap nna tsun lai wa ai.

Wa Sarabyin tsun ai ga hpe bai kahtap nna saradaw kaba tsun ai hta, “si ari jaw je yang ai tara jahkrat lang ai lam gaw galoi mung awng dang lu na n rai, hpa majaw nga yang dai gaw tara rap ra ai lam ngu ai ga baw npu hta masha asak sat ai lam rai nga ai, raitiam mung shinggyim masha asak sat nna tara rap ra ai lam ngu ai ban dung hpe galoi nlu la mai nga ai” nga nna saradaw kaba tsun dat nga ai.

Si ari jaw je yang ai lam galaw ai hta nre ai masha hpe shut nna si ari jaw kau ai lam ni mung nga pru mai ai lam saradw kaba tsun madi madun lai wa ai. Ndai lam hte seng nna Wa saradaw kaba tsun ai hta, shinggyim masha a tara je yang ai lam hta shut chye lu mai ai ngu ai masa hpe myit dum ra ga ai, rai tim mung si ari jaw kau hkrum nna si mat sai masha wa hpe gaw bai jahkrung la lu mai baw nrai nga ai. Si ari jaw je yang dat ai lam hta mara kata masha langai a asak hpe dawm kau ya ai zawn re ai lam ni nga pru mai ai ngu ai lam hpe mung sung sung myit shalawm ra ga ai. nga nna mung Saradaw kaba tsun sadi jaw dat nga ai.

Mungkan shadang nna maram yu yang si ari jaw je yang ai lam hpe ning hkap ai lam ni rawt jat wa ai masa hpe mu mada lu nga ai. Ga shadawn American mungdan hta, lai wa sai 1995 ning hta si ari jaw je yang ai lam hpe madi shadaw ai masha tsa htam shadang 80 daram nga lai wa ai rai tim, 2010 ning masam maram da ai jahpan hta si ari jaw je yang ai lam hpe madi shadaw ai masha hta htam shadang 39 daram sha nga nga ai hpe mu lu nga ai. Raitim mung Philippines mungdan hta gaw 1987 ning na mungdan gaw da tara hte jahkring kau sai si ari jaw je yang ai lam hpe bai asung jashawn jai wa wan a matus shakut shamu shamawt nga ai lam ni hpe mung mu mada nga ai, nga nna EWTN shiga dap kaw nna shana dat ma ai.

Source: Ewtnnews


Matut Mahkai Ga

Facebook