Majan a majaw hprawng htawt hkawm nga ai, tsin yam hkrum ramma ni a shanu shing byin shara rai nga ai Guatemala mungdan na Casa Refugio Virgen ngu ai shing byi shara wan hkru hkat ai hta asak si hkrum lai wa sai ni a matu akyu jawm hpyi garum ya ga nga nna lai wa sai laban shani Wa Sarabyin Francis tsun lajin dat nga ai.

Kasu kabrawng shawa n gun madun lam ni byin pru wa ai hpang, masha langai ngai kaw nna yup ra panep wan nat dat ai kaw nna wan hkru hkat hpang wa ai re, num sha ni shanu nga ai shara maga kaw nna hkru hkat hpang wa ai, dai wan hkat ai lam a majaw nlaw htum masha marai 35 asak asak si hkrum lai wa ai, nga nna seng ang ai mung up du ni kaw nna tsun da nga ma ai. Masha marai 500 daram sha shing byin mai na matu gaw gap lajang da ai ndai tsin yam shing byin shara hta, wan hkru hkat ai aten masha marai 800 jan shanu nga ai re, nga ai. Ma ni hpe aroi arip galaw ai lam ni law law byin pru nga ai, matsut matsat re ai, malu masha alaw ahtam nnga ai, san seng ai lam ni hte seng nna atsawm lajang ya ai ai lam ni nnga ai, nga nna kajai nga ai tsin yam hkrum masha ni a shing byi shara mung rai nga ai.

Wa Sarabyin tsun ai hta, “ndai Casa Refugio Virgen ngu ai, Guatemala na tsin yam hkrum masha ni a shing byi shara wan hkru hkat ai lam a majaw myit ru yawn hkyen hkrum nga ai Guatemala muungdan, mung chying sha ni hte rau myit hpawm nga nngai, asak si hkrum lai wa sai ma ni a wenyi hpe Karai Kasang hkap la ya u ga, hkala nba hkrum ai ni hpe Karai Kasang shamai shatsai ya u ga, yawn hkyen hkrum nga ai dum nta masha ni hte , mung chying sha ni yawng hpe Karai Kasang shalan shabran ya u ga, majan hte kaga tsin yam lam amyu myu a majaw aroi arip hkrum nga ai num sha ma, la sha ma ni yawng a matu rau akyu jawm hpyi nga ga, ndai zawn ip magap da ai jam jau hkrum nga ai tsin yam hkrum masha ni a mabyin hpe masha yawng na chye lu mu ga, ndai zawn re ai masa hpe anhte nmu, nchye masu nga ai masa hpe jahkring kau ra na ga ai, nga nna lai wa sai laban shani shani ka-ang Angelus akyu hpyi ai aten shawa masha ni hpe Wa Sarabyin Francis tsun lai wa ai, nga nna Vatican radaio kaw nna shana dat ma ai.

Source: Vatican Radio


Matut Mahkai Ga

Facebook