Wa Sarabyin Francis gaw lai wa sai 2013 ning March shata 13 ya shani nawku hpung a 266 ngu na sarabyin tai wa ai hte, ndai March shata 13 ya shani gaw Sarabyin ya lata dang da hkrum ai (4) ning ladu hkrum ai nhtoi rai nga ai.

Ndai (4) ning laman, nawku hpung hte, nawku hpung gin jaw rung ni hpe gram lai ai lam ni galaw ai, bat masum ya shani shagu Wa Sarabyin hte hkrum na matu san Peter pa kaba hta shawa daw tsa wu wu di di du hpawng ai, matsan dum lama ai lam madun na matu saw shaga ai, jut shara magup hta shanu nga ai matsan mayam ntai nmai nmai ni hpe myit du ai hte matut mahkai lakawn lam ni galaw ai, ndai lam ni gaw Wa Sarabyin Francis a lak lai ai sasana magam lam ni nan rai nga ai.

Labau shang magam bungli ni hpe mung, Wa Sarabyin Francis galaw lai wa ai, dai ni hta, Russian mungdan Orthodox hpung ning baw hte Cuba mungdan hta hkrum shakram ai lam galaw lai wa ai, Nazi masha sat dabang galaw lai wa ai Auschwitz hta sa du nna akyu hpyi lam galaw lai wa ai, Mother Teresa hpe san pra ai masha dang da lai wa ai, Pritenstant ga garam hpang wa ai 500 ning hpring masat aten hta Lund de sa du nna kaga hkristian hpung ning baw ni hte hkrum shaga bang ban ai lam galaw lai wa ai, “Amoris Laetitia” ngu ai matsun laika hpe dip shabra lai wa ai lam ni rai nga ai.

Wa Sarabyin a sarabyin hte ni ni htep htep nga nna magam gun nga ai Vatican amu madu Cardinal Parolin tsun ai hta gaw, sarabyin tai wa ai shani shawng nnan shawa hpawng hte hkrum ai aten “buona sera” nye a matu akyu hpyi ya marit nga nna tsun let baw gum nna shawa masha ni a akyu hpyi ya ai lam hpe Wa Sarabyin lajin lai wa ai, shi a prat hpe Madu Karai Kasang hte Karai Kasang a chyoi pra ai a amyu masha ni a lata hta kam hpa ap jaw ai lam rai nga ai, Karai Kasang a shaman chyeju hte tsawra matsan dum lama ai lam hpe kam hpa let, sagu hpung hte sagurem rau akyu hpyi let nawku hpung shawng de sit nawt hkawm sa nga ra na, ngu ai shi a sasana yaw sing myit mada ai lam nan rai nga ai. Francis ngu ai amying shing teng hpe hkap la ai lam mung, sim sa ai, myit san seng ai, sum nung shingdi ai myit masa hpe shaleng na matu rai nga ai.” nga nna Caridanal Parolin tsun lai wa ai.

Vatican Curia ngu ai nawku hpung gin jaw magam dap ni a shamu shamawt magam bungli glaw ai lai ladat ni hpe gram lai lam ni galaw ai Wa Sarabyin a yaw shada ai lam madung hta, shaning tsa lam hte ru nna kap noi nga ai baza bala ni hpe gaw jahkrat kau nna kabu gara ai shiga hte htoi kabrim nga lu na matu, ngu ai yaw shada ai lam hte rai nga ai, nga nna Wa Sarabyin a sarabyin aya dang da hkrum ai 4 ning hpring ladu hkrum nhtoi hta Cardinal Parolin tsun lai wa ai lam Vatican radio kaw hnna shana dat ma ai.  

Source: Vatican Radio


Matut Mahkai Ga

Facebook