N kaja ai lam hpe koi yen ai, mai kaja ai lam galaw chye hkra hka ja ai, tinang a prat hpe Madu lam woi la rit ga ap ya ai, ndai gaw Lusha gam ladaw a myit yawn myit malai ai lam rai nga ai, nga nna shi a jahpawt na missa hkungga hta Wa Sarabyin Francis hkaw tsun lai wa ai.

Wa Sarabyin tsun ai hta, “mai kaja ai lam galaw ai ngu ai lam gaw loi loi mai mai re ai lam nrai, ding run hkaja la ra ai, Madu anhte hpe sharin ya nga ai. Ma kaji ni zawn hka ja la ra ai, Hkristian prat hkrun lam tha shani shagu hka ja la ai lam ni galaw ra ai. Mani na hta grau kaja ai prat hte hkawm sa lu hkra shani shagu hkaja ai lam ni galaw ra ai. N kaja ai lam hpe koi yen ai, mai kaja ai lam ni galaw chye hkra hkaja la ai ngu ai lam ni gaw chyoi pra san seng wa na lam hta hkan sa hkawm sa ra ai tara ni rai nga ai, hpa majaw nga yang chyoi pra san seng wa ai ngu ai lam gaw man dan mawk le zawn kalang lata a kajawng sha byin pru wa ai baw hpan nrai, ding run hkawm sa nga ra ai hkrun lam she rai nga ai, n kaja ai lam hpe koi yen, kaja ai lam ni galaw chye hkra hkaja hkawm sa nga ai prat hkrun lam she rai nga ai. Ta tut hkan galaw mai ai lam ni law law nga ai hta na hpan (3) Madu Yesu madi madun ya nga ai, dai gaw, teng man rap ra ai lam hpe hkan tam galaw shatup na, adip arip di hkrun nga ai ni hpe shalawt dat ya na, matsan mayan gai daw gai da ni hpe makawp maga lam galaw na, ngu ai lam rai nga ai. Ndai gaw ta tut hkan galaw mai ai lam ni rai nga ai. N gup aga hte sha nrai ta tut galaw shabyin chye hkra hkaja la ra na ga ai. N gup aga hte sha tsun shaga nna ta tut hkan galaw ai lam ni nnga ai Yuda ning baw ning la ni hpe Madu Yesu tsun daru kau ai lam ni hpe kabu gara ai shiga hta na lu nga ga ai. Ta tut hkrang shapraw galaw ai ngu ai lam nlawm ai rai yang jet ai chyoi pra san seng wa lam ngu ai n byin pru lu nga ai nga nna Wa Sarabyin hkaw tsun lai wa ai lam Vatican radio kaw nna shana dat ma ai.

Source: Vatican Radio  


Matut Mahkai Ga

Facebook