Nu wa hpu nau ni, dinghku kata hta, Madu jan madu wa hkawng yen hte seng ai ru di ru hpang, ra kadawn nga ai lam hpe shada chye madat hkat ya ra ai lam hte seng nna, Npawt nhpang laika 2: 18 hta shinggyim masha gaw langai sha nmai nga ai lam hpe tsun da nga ai. Bai, Malachi laika 2: 14 hta mung, Malachi hku nna, madu jan gaw ga shaka lam hte maren nrum ntau tai na lam hpe tsun da nga ai rai nga ai. Dai majaw, dinghku de ai ngu ai gaw, Karai Kasang nan, yaw shada, maw mawn jahtuk da ya ai rai nhtawm me, shada da a, ra kadawn ai lam ni hpe jahpring shatsup ya na yen nan rai nga ai re. Dai zawn Madu Karai Kasang nan jahtuk da ya ai dinghku hpe kadai e mung nlu jahka ai rai nga ai. Shan gaw, prat tup na matu, langai sha tai nga sai rai nga ai. Dai majaw, lam shagu hta, shada da yu jahtuk hkat ra ai zawn, shut shai ai lam ni hta mung, shading sharai ya hkat na nmai malap nga mali ai re. Dai zawn rai yang she, nan a dinghku gaw, shada da chye madat hkat ai dinghku tai n’htawm, galoi mung sim sa, pyaw ngawn ai dinghku majing hpe gaw gap lu na rai nga ai.

Lawrence Crabb ngu ai, Christian myit hpaji ninghkring wa gaw, shaning law law dinghku a lam hte seng nna, sawk sagawn mat wa yu ai shaloi, madu wa ni a ra ahkyak dik htum, ra kadawn, ra sharawng nga ai lam gaw, lak lai dan dawng mayu ai lam hpe mu lu ai, nga nna sawk sagawn la lu ai lam hpaw tsun da nga ai. Shi hkum nan mu mada lu ai hku nga jang mung, a law a lam re ai hpe ra ai, hkungga jaw ai hpe ra sharawng ai hte, mau hpa shakawn shagrau ya na hpe ra sharawng nga ai, nga nna matut tsun da nga ai. Bai, ningrum ningtau jan a ntsa hta, ningrum ningtau wa ni ra sharawng dik gaw, machyi shim ai lam, makawp maga ya na hpe ra sharawng dik rai nga ai. Kaja wa nan mung, dinghku kata hta ra ahkyak dik gaw, ya sha tsun ai machyi shim lam hte makawp maga ya na lam nan rai nga mali ai re.

Dai zawn, madu jan madu wa shada da dinghku kata ga sadi dung, kam hkat ai rai jang gaw, dinghku kata npyaw na lam hpa mung nnga na re. Dai zawn machyi shim, makawp maga ya hkat ai rai jang, Shada da kam hkat wa na, shawang tsawra myit gaw, shi hte shi ngang grin wa na, hkap la lit la ya ai myit, ningrum ningtau wa shing nrai, ningrum ningtau jan a hkam sha nga ai garen gari myit ni mung, hkoi mat wa na gaw teng sha rai nga ai. Dai majaw, ningrum ningtau wa ni gaw, ningrum ningtau jan ni a ntsa ra sharawng dik gaw, shawang tsawra myit hte, machyi shim, makawp maga ya na, hkap la lit la ya ai myit ni ra sharawng dik rai nga ai hpe ningrum ningtau jan ni matsing da ra nga mali ai re. Dai hte maren sha ningrum ningtau wa ni mung, tinang a ra sharawng lam hpe sha, ting kyeng nmai myit ai. Ngai pyi gaw daizawn ra sharawng ai wa, ngai a madu jan mung n’dai lam ni hpe ra sharawng na gaw, teng sha rai na re ngu myit dum let, ningrum ningtau jan hpe, makawp maga ga, machyi shim let, hkap la lit la ya ai myit ni hpe galoi mung jaw nga ga ngu mayu n’ngai. Reng jang she, nan a dinghku gaw shada da a ra kadawn nga ai lam ni hpe shada chye madat hkat ya lu na gaw teng sha rai na re. Dinghku ngu ai hta, Madu Karai Kasang ra sharawng, yaw shada ai lam gaw, madu wa gaw, madu jan a machyi shim lam a matu ra sharawng ai lam hpe jahkum shatsup ya na hte madu jan mung madu wa ra sharawng ai, dan dawng hkungga jaw na lam hpe jahkum shatsup ya nga na nmai malap nga mali ai re. Ndai gaw, Madu Karai Kasang wa hkum nan ra sharawng ai hte, yaw shada ai lam madung nan rai nga ai hpe matut myit dum nga ga nu wa ni.

Kalang lang, kun dinghku kata hta, myit npyaw ai lam ni nga wa jang, e... galoi mung, ning rai na hkrai nga gaw, nmai na nhten? kalang lang gaw anut hkat na zawn mung nga wa ai, nga ai ni mung lawm na re. She teng law, dinghku nnan prat hta, lahta de na la lu sai lam ni hpe hkan sa lu ai raitim, dinghku prat na wa jang gaw, hpa sha nre hkan lata lahpum sharawt ai ten ni nga wa chye nga ai re. Dai gaw, madu jan madu wa shada da ru di ru hpang, ra kadawn nga ai lam hpe shada chye madat hkat ya ra ai lam n nga ai majaw rai nga ai. Madu wa mung, shi a arawng lu na sha myit, dai hte maren, madu jan mung, shi myit ai lam sha jaw dum rai jang gaw, ngwi pyaw ai dinghku hpe gara hku mung matut gaw de lu na nre. Shada da chye na ya hkat na malai, tinang a shim lum lam, tinang hpe chyu chye na hkap la ya ra ai nga jang gaw, nan a kashu kasha ni hpe gara hku kasi kaja madun na rai kun? myit yu ra na gaw teng sai nu wa ni. Dai re majaw, madu jan madu wa, hkawng yen, shi she grau ngai she grau nga na malai, kashu kasha ni a myi man tau let, ningrum ningtau wa mung, aw…ngai a gai nu jan gaw, ma ni a ntsa ra mara mahkra lajang ya ai, atsawm sha tsun shaga chye ai, dum nta kata ra mara hpe mung, mu chye, galaw chye ai, dik shale, manam sa tim, sumsai myi man hte akaw alaw nga hkap pang hkalum la chye ai ngu shagrau n’gun jaw la ga. Bai, ningrum ningtau jan ni mung, rai nga ai loo,,,,ngai a tsawm shadang wa gaw, annu ni yawng a matu, lu na sha na sha n’ga, dinghku a lit magam hpe chye myit chye mang ai, kashu kasha ni hpe hpaji hparat lam, bawng ring lam ma hkra hpe matsun madun, sharin ya ai kawa langai nan re ngu shagrau la ga ngu mayu n’ngai. Nu wa hpu nau ni, daizawn myit masa dam lada ai lam n’nga jang gaw, dinghku a ru di ru hpang, ra kadawn ai lam hpe n’chye madat hkat jang gaw, n’myit mada ai, dinghku kata mang hkang ni byin chye nga ai re. Kaning re ai mang hkang ni rai kun? ngu ai hpe bai hka ja yu ga.

Nu wa hpu nau ni, dinghku kata kaw e, n myit mada ai sha, manghkang byin wa ai lam mung, madu jan madu wa hkawng yen shada da chye madat hkat ya ra ai lam n’nga ai majaw rai nga ai. Dinghku kata hta sha n’re, kaning re ai u hpung u hpawng hta rai tim, chye na hkat ya ra ai lam gaw, ru di ru hpang, ra kadawn nga ai lam langai rai nga ai. Dinghku kanu kawa gaw re da, chye na hkat ai lam ni n’nga rai jang gaw, ningrum ningtau wa ngu na mung, ningrum ningtau jan a ntsa, tinang arawng lu na matu sha shamyet shanat rai, nga chye nga ai. Dai hte maren, ningrum ningtau jan ni mung, tinang a madu wa e shi hpe hpa myit tsang lam n nga hkra woi lakawn nga na hpe sha kam hpa nga chye ai. Dai gaw, jet ai dinghku n’rai nga ai nu wa ni, ap nawng ai myit masa ntai ai sha, a myat lu na matu sha gaw de ai dinghku hte bung na gaw teng sha re. Ya na zawn dinghku kata kaw e, daw jaw daw ya na hta, tinang hpe madaw galaw daw ya na hpe chyu myit mada nga ai lam gaw, tinang hkum hpe sha n’ga, myit masin hpe du hkra grai naw gram la ra ai ngu ai lachyum dan dawng nga mali ai re. Tinang a ra sharawng myit mada ai lam, byin wa na, galaw ya na re ngu ai myit nau law ai majaw, tinang gaw n dum tim, n dai myit a majaw, n’gun atsam yawm mat hkra, shamyet shanat mayu ai myit nau kaba nna, shada da a kanawn mazum lam ni galai shai mat nhtawm me, Madu Karai Kasang a yaw shada ai lam ni hte mung n’htan shai mat wa chye ai hpe n mai malap nga mali ai nu wa ni.

Bai, hpa lam hpe mung n myit mada ai sha tsawra nga ai lam gaw, shawang myit byin pru wa ai lam nan rai nga mali ai. Dai majaw, dinghku lit magam hta ta tut gun hpai shakut nga sai nu ni wa ni e,,,,, No1. ahkyak dik gaw, tinang a hkum hpe tinang san dinglik yu na lam rai nga ai. Madu jan mi rai rai? Madu wa mi rai rai? nye a ningrum ningtau wa/jan hpe ngai kaja wa tsawra nga ai kun? ngu ai lam re. Shi hpe galaw daw jau ya ai lam hta, ngai hpa hpe mung n’myit mada ai sha, kaja wa jet ai tsawra myit hte, galaw daw jau ai, chye na ya ai, shing n’rai, madu jan, madu wa re majaw, n’tsa lam, rai jang rai sai ngu ai myit masa hte rai kun? myit yu ga. Dai zawn di ai hpe tinang myit dik nga ai ngu lu tsun na kun? nu wa ni.

Lama na, e…., ngai dai hku n’galaw ya lu ai ngu mahtai jaw yang, hpa myit htum shara n’nga ai. Hpa majaw nga jang, lahta de tsun sai hte maren, ndai lam gaw, dinghku hta byin chye ai lam ni rai nga ai. Raitim, byin chye ai she re maw nga nna, dai hku sha matut nga jang gaw, nmai na re. Yak ai hpe yak ai ngu nna, n’nga shalai ai sha, ngai dinghku a kanu shing n’rai kawa langai hku nna, shawng de gara hku sit sa wa na, gara hku galaw daw jau na ngu ai hpe madung da shakut sa wa ra sai Nu wa ni. tinang byin mayu ai, masha ni e galaw daw jau ya na hpe, nau nmyit mada ai, myit masa hpe galai bang da ra nga sai re. Ya sha tsun ai n’dai myit masa hpe galai shai lu jang gaw, dinghku kata, ru di ru hpang, ra kadawn ai lam hpe shada chye madat mara hkat lu na gaw, ga lahtum nshut rai na re.

Nu wa ni, Christian dinghku la langai mi hku nna, tinang a dan dawng arawng lu na lam hte seng nna, Madu Yesu hpe katsi la, hkan sa shatup ra ai zawn, Christian dinghku num langai mi hku nna mung, tinang a shim lam, makawp maga la na lam hte seng nna, Chyoi pra ai Nu Maria a shagrit shanem, san tsawm ai myit masa ni hpe kasi la, kam hpa ra nga mali ai re. Christian makam masham hta n’pawt gaw de da ai kun dinghku ni yawng, Madu Yesu Hkristu a kasi hpe yu la na nmai malap nga ai nu wa ni. Shi Madu Karai sha anhte yawng a ra sharawng lam ma hkra hpe galoi mung jaw ya nga ai majaw rai nga ai. Shinggyim masha gaw, mungkan ga kaw masha sa pra ai ten kawn nna, tinang a myit mada, ra sharawng ai lam ni byin wa lu la na hpe myit mada nga ai ni hkrai rai nga ga ai. Dai majaw mung, tinang a myit ra hpe hkan nna, manang wa hpe hpa zawn nnawn, byin chye nga ga ai. Hpan Madu Karai hpe malap mali rai, ngai ngu ai myit masa a majaw, dinghku kata sha n’ga, u hpung u hpawng kata hkan, nhkrum n ra, myit n pyaw hkat byin ai lam law law nga nga ai hpe anhte a makau grup yin hkan mu mada lu na ga ai.

Hpan Madu Kawa Karai Kasang hte shi a kasha shingtai Madu Yesu Hkristu hpe malap mali di kau nhtawm me, mying dan hkung, arawng aya lu na, sim sa, shim lam lu na matu hte hpring tsup ai prat hpe, tinang ra sharawng ai hku nna byin pru wa na hpe sha madung da chye nga ma ai re. Bai masha nkau mi gaw, tinang a myit hpe sha machyu nna, masha ni a lapran dan dawng, a rawng a ya lu la sai, myit tsang shara nnga sai, nga nna myit tsaw, myit gyip, gumrawng chye ai hpe mu mada lu nga ga ai. Dai zawn, myit rawng ai ni gaw, dinghku prat de shang gabe wa ai raitim, dai myit masa ni naw rawng chye ai hpe myit dum ra nga ai. Shabrang prat hta, dai myit masa nga tim, kun dinghku lit hpe gun sai hte gaw, dai myit masa ni galai shai kau ra sai re. Lama na, n’lu galai shai ai rai jang gaw, nnan daw hta, kun dinghku kata nga pyaw tim, gau ngwi ngwi, n’myit mada ai ten, dai myit masa ni bai pru wa na gaw teng sha rai nga mali ai re. Nu wa ni, jet ai dan dawng arawng a ya lu ai lam, jet ai shim lam lu la sai, ngu hkam la tim, Madu Yesu hte htep lahti matut mahkai ai lam n’nga yang, awng dang na matu yak na re. Dai majaw, dinghku prat hkrun lam tup hta, shada da chye na ya hkat let, Madu Yesu hta ap nawng let, myti hkrum ai hte matut gaw de sa wa ga ngu n’gun jaw mayu n ngai.

Ja Chyum Mungga, Colossion laika 2: 10 hta San Pawlu tsun da ai hte maren, “Madu Yesu hta anhte hkum tsup saga ai” ngu ai ga gaw, npawt nhpang gaw Madu Karai nan rai nga ai. Shi hta, machyu jung let, sak hkrung hkawm sa na matu rai nga ai. Lama na, Madu Yesu hte rau, matut mahkai ai lam n’nga jang gaw, tinang ra sharawng ai lam hta gade mi shakut tim, hkum hkum tsup tsup re ai part masa hpe lu la lu na n rai nga ai. Dinghku de ai ngu ai gaw, myit masa n’bung ai, kalang lang chye pyi nchye hkat, nmu hkat ai, ntsawra hkat ai, kahtawng mare nbung ai shara na ni hte gaw de ai law ai hpe mu mada lu nga ga ai re. Nkau chyawm gaw, hkawng yen myit hkrum tsawra nna, gaw de ai ni mung nga nga ai. Gara hku mi rai rai, myit masa n’bung ai gaw de ra ai re majaw, kalang lang nchye madat hkat jang, mang hkang ni byin wa chye ai hpe myit dum ra nga ga ai re. Ya sha tsun ai tsawra nna mi rai rai, ntsawra nna mi rai rai, Madu Karai Kasang a man hta ga sadi la let, gaw de hpang sai dinghku hta Madu Karai Kasang lawm nga sai re. Dai majaw, dai zawn gaw de sai Hkristian dinghku hpe shaman chyeju gaw, jaw nga ding yang rai nga ai. Dai chyeju ni hpe nchye hkap la jang gaw, nan a dinghku kata ra kadawn nga ai ru di ru hpang, shada chye madat hkat ra ai lam ni hta ningra wa na rai nga ai.

Ga shadawn, dinghku num langai mi, shi a dinghku prat hpe maroi n’ni, nhpring tsup dum ai sha hkam sha nga jang gaw, myit pyaw lam lu na nre. Daizawn myit pyaw ai lam n’nga ai ten, dinghku a madu wa ngu na wa mung, madu jan hpe, kaja ai lam n’mu, ra ai lam hkrai sha tsun jang gaw, ngai a ningrum ningtau wa mung, ngai hpe ntsawra ai, magam bungli shagu hta, nkam ai nga nna, myit hta hkam sha nga na rai nga ai. Daizawn hkam sha myit rawng sai hte gaw, dinghku kata matut sak hkrung na matu yak na rai nga ai. Bai, ningrum ningtau wa hpe mung, kam hpa lam yawm mat wa nhtawm me, dinghku a shinggan de shim lum lam tam wa na gaw teng na nhten. Dai shaloi, dinghku a ru di ru hpang, ra kadawn nga ai lam ni hpe shada chyena hkat na lam mat mat na teng sha re.

Kalang lang, dinghku kata hta, madu jan shing n’rai, madu wa hta ya sha tsun ai hkam sha lam ni byin wa ai shaloi, makau grup yin htingbu htingbyen ni hku nna, n’gun jaw, shalan shabran ya ai lam ni mung, nga na shadu ai. Makau na ni gade mi n’gun jaw, madi shadaw tim, tang du ai lam n’nga, byin chye ai. Dai hpe mung myit dum ra nga mali ai. Hpa majaw nga jang, tinang a ningrum ningtau wa, shing n’rai, ningrum ningtau jan hkum nan, n’gun jaw ai hte shai ai majaw rai nga ai. Dinghku kata n’myit mada ai sha mang hkang ni byin wa ai ten, shada da nang shoi nang sha nga tim, madi shadaw, n’gun jaw na ra dik htum gaw, tinang a ningrum ningtau wa, shing n’rai ningrum ningtau jan a tsawra matsan dum myit, makawp maga ya ai lam, chye na, chye myit ya ai lam gaw ra sharawng dik rai nga ai. Dai majaw, ningrum ningtau wa myit n’pyaw, myit pawt nga ai ten, dinghku a madu jan gaw, a’zim sha nga kau u. Dai hte maren, ningrum ningtau jan myit pawt nga ai ten, dinghku a kawa gaw zim sha nga ya u. Dai shaloi she, dinghku kata, ahkyak dik rai nga ai, ru di ru hpang, ra kadawn nga ai lam hpe shada chye madat hkat ya na rai nga ai. Dai chye na hkat ai rai jang, myit masin kata galai shai ai lam ni mung byin wa na rai nga ai. Gau ngwi ngwi, nan a dinghku gaw, Yesu, Maria, Yoseph a dinghku zawn, hpring tsup ai dinghku majing tai wa na rai nga ai.

Nu Wa ni, dinghku kata na, ru di ru hpang, ra kadawn nga ai lam hpe shada chye madat hkat ya ai rai jang gaw, Madu jan madu wa shada da shakawn shagrau la na, bai, shi ra sharawng ai lam ni, galaw ya na hpe n’myit mada ai sha, tinang shawng galaw daw jau na myit sha rawng wa na gaw teng sha re. Dinghku a kawa mung madu jan hpe sha, madung da myit wa ai zawn, madu jan mung, madu wa hpe sha madung da myit taw nga na rai nga ai. Nnan daw hta nchye madat hkat ai lam yawng, shada chye na wa ai hpang gaw, lam shagu hta mai kaja ai hpe sha mu mada wa na rai nga ai. Myit ndik myit npyaw, mara shagun ai lam hta, ndai n’gun kya ai lam kaw nna, n’gun lagaw hpring tup hte galaw daw jau ya lu nga sai rai nga ai. Dinghku kata ra ahkyak dik ru di ru hpang, ra kadawn lam hpe shada chye madat hkat ai dinghku gaw, galoi mung, sim sa ai hpe mu mada lu na rai nga ai. Anhte a makau grup yin hta, dinghku hte seng nna, amyu myu mu mada lu na ga ai.

Kanu kawa ahkum ara rai, simsa nga pyaw ai dinghku, kanu lu tim, kawa nlu mat, shing n’ra, kawa lu nna, kanu nnga mat ai, nkau gaw, kanu kawa hkawng yen n’lu mat ai ni mung nga na re. Bai, n’kau gaw, ten tup ga law hkat nna sha nga ai, dinghku hpe mung mu mada lu na re, n’kau bai rai jang, kashu kasha ni gaw myit su kunghpan wa, kanu kawa ni gaw, wan mang kaw taw ba chyu ahpum nna nga ai ni mung nga na re. Dai hte maren, kanu kawa ni gaw, hpaji chye, myit su salang ni re da, kashu kasha ni gaw, n’hkru nkaja ai lam hta sha shang lawm nga ai ni mung nga na n’hten. Nu Wa hpu nau ni, pyaw ai dinghku mi rai rai, yak hkak jam jau ai dinghku mi rai rai, dinghku hta ahkyak dik npawt nhpang rai nga ai, ru di ru hpang, ra kadawn ai lam hpe shada chye madat hkat ya ai lam hpe gaw gap lu hkra shakut nga ga, ngu mayu n’ngai. Reng jang she nan a kun dinghku gaw, galoi mung shada chye na hkat ai, ngwi pyaw sim sa ai dinghku majing hpe gaw gap lu na rai nga ai law.

Ka Lajang ai – Mama Rose Angeline Maran Nang Doi

                        RVA – Jinghpaw Nsen Shapoi Dap

                         Manila, Philippines.       


Matut Mahkai Ga

Facebook