Nu wa hpu nau ni, sak prat ram sai shayi shadang sha shagu ngu na ram, tinang hte prat tup ta gindun na ningrum ningtau gaw gadai wa rai na kun? Ganing re ai ningrum ningtau wa she ang na kun? Gara hku lata na kun? ngu ai lam myit na gaw teng sha rai na re. Hpa majaw nga jang, anhte Catholic nawku hpung makam masham hta, Jau tai, Mama tai, shing n’rai, kun dinghku lit hpe gun hpai ra na gaw teng sha re. Dai majaw mung, n’dai dinghku lit magam a matu, “ningrum ningtau gara hku lata na ngu ai lam” ni gaw myit ra chyalu, sawn ra chyalu, chye ra chyalu rai nga mali ai re. N’dai lam gaw, shingra htung tara hta tawt lai ra ai lam rai nga ai. Rai yang, n’dai lam hte seng nna myit ra sai ngu gaw, gara hku lata na rai kun? No 1. Tinang gaw grai tsawra ai, ningrum ningtau tai na wa hpe lata na kun?, (Shing nrai) nau n’tsawara chye ai wa hpe mahtang lata na kun? No2. Kanu kawa makin jinghku ni myit hkrum jaw sha ai hpe lata na kun? No3. Tinang gaw n’tsawra tim, Tinang a prat hpe sharawt ya na, ra mara mahkra jahpring shatsup ya na wa hpe myit mada nna, yaw shada let, lata na kun? No4. Tsawra myit hpe da-mya zawn, n’lu lu hkra la ai wa hpe lata na kun? No5. Moi kaji ten kawn nna, sak prat ram du hkra, shada tsawra hkat ai (sumtsaw alat) hpe lata na kun? No6. Hkum sai shan a matu sha myit nna yaw shada ai ningrum ningtau hpe lata na kun? Lama lata hkrup ai rai jang, na a prat tup nang gara hku hkam sha na kun? No7. Tinang hpe gaw grai tsawra ai, raiitm, tinang gaw, shi daram n’lu tsawra ai, daizawn re hpe lata na kun? Myit sawn sum ru yu mai nga mali ai nu wa ni. Lahta de na la lu sai, lam yan (7) hpe myit yu ai shaloi, gara madang hku mi rai rai, tinang a prat hta ang wa ai chyeju re ngu hkam la na n’mai malap ai. Lama na, tinang yaw shada da ai hku n’byin tai wa ai rai jang, myit daw na lam n’nga hkra, n’gun jaw mayu n’ngai.

Ga shadawn, Tinang gaw grai tsawra ai, (Shing nrai) nau n’tsawara ai wa hte dinghku de ang wa ai rai jang, tinang hku nna, galoi mung tsawra myit jaw nga jang, lani mi chye madat wa nna, tsawra wa na ra ai. Dai shaloi, nan a dinghku gaw, shada da chye na chye madat hkat ai dinghku tai wa na rai nga ai. Nan a makau grup yin hta mung dai zawn gau ngwi ngwi, shada da chye madat hkat wa ai dinghku ni law law nga ai hpe myit dum let, n’gun la u. matut nna, Kanu kawa makin jinghku ni myit hkrum jaw sha ai hpe lata na kun? Ngu ai hta, kanu kawa, makin jinghku ni gaw, nan hpe htap htuk manu dum ai majaw, gaw de ya ai re majaw, nan gara hku lata gindun na kun? Shada da a lam mung n’chye hkat, ra n’bung, myit masa n’chye hkat ai re majaw, hkam sha yak na gaw teng sha re. Dai zawn n’chye hkat ai ten ladaw jahkring mi hpe hkam sharang let, hkawm sa u. Shada da n’tsawra shi ai re majaw, jum n’lawm ai si mai zawn nga ra ra gaw nga na re.

Raitim, gau ngwi ngwi, shada chye na, tsawra wa jang, namchyim rawng ai dinghku hpe gaw de lu na rai nga ai. Bai, matut nna, Tinang gaw n’tsawra tim, Tinang a prat hpe sharawt ya na, ra mara mahkra jahpring shatsup ya na hpe myit mada nna, yaw shada let, lata ai ngu gaw, gara hku mi man hkrum shakut na kun? Dai zawn, yaw shada ai ni gaw, no.1 tinang hkum nan, galu kaba mayu ai myit, chyeju bai htang chye ai myit hpe arang shaw nna, shakut yu u. a’myat la mayu ai, myit mada ai ni hkoi mat nhtawm me, tinang a ningrum nigtau a n’tsa chye madat tsawra wa na gaw teng sha rai na re. Dai zawn, myit hpe galai shai kau ai a marang e, mungkan n’tsa, matsan ai prat kaw nna, lu su sahti, byin ai dinghku ni law law nga nga ai hpe mu lu nga mali ai re. Maga mi de mung, tinang a myit masa zawn, myit ai ningrum ningtau hte hkrum ai rai jang, tinang mung gara hku nna hkam sha na kun? Lama na dai zawn re ai myit masa hte, tinang hpe ningrum ningtau hku nna, lata ai rai jang, nang hkum nan dai myit hpe galai shai ya lu hkra tsawra myit hpe arang shaw jai lang u. Shaloi nan a dinghku gaw, grau grau galu kaba wa na teng sha re. Gade matsan tim, tsawra myit hpe madung shatai jang gaw, lani mi, tsawm htap ai, lu su sahti ai dinghku tai na gaw, teng sha re. Dai hpe myit dum ra nga mali ai nu wa ni.

Matut nna, tsawra myit hpe da-mya zawn, n’lu lu hkra la ai wa hpe lata na kun? Ngu ai hpe bai myit yu ga. Tinang hpe she manya na ram tsawra ai law nga nna, lata wa ai ten, n’nan daw hta, mau mat na gaw teng na shadu ai. Mau ai ngu ai hta, tinang hpe dai daram tsawra ai gaw, nga nna, tinang mung, jahkring mi na ten laman hta, aw..Ngai hpe dairam tsawra ai, nga nna, myit dik ai zawn gaw hkam sha na re. Yet htawm hpang ten du hkra tsawra lu ai wa rai kun ngu ai hpe sadi maja ra na n’mai malap ai. Dai zawn, she manya hkra tsawra ai, ngu ai ten hta, tinang mung, shi a tsawra myit hpe manu shadan let, a’tsawm sha sharin shaga, jaw ai de, prat tup she manya na daram tsawra mat hkra woi zin lum la u. Rai jang, tsawra myit gaw hkyet mat na n’re. Matut tsawra nga ding yang rai nga na re. Bai, Moi kaji ten kawn nna, sak prat ram du hkra, shada tsawra hkat ai (sumtsaw alat) hpe lata na kun, ngu ai shaloi, Tsawra myit lahkawng hpe madung da nna, gaw de ai re majaw, nau wa mang hkang n’nga ai. Hkawng yen moi kaji ten kawn nna, shada chye na hkat ai, tsawra hkat ai re majaw, kyang lai len ni yawng chye na chye madat hkat rai, mang hkang nau n’nga ai hpe mu mada lu ai. Shan a lapran hta shada chye madat hkat ai re majaw, ja gumhpraw lam, mayu da ma makin jinghku lam hta mung, tsawra myit hte makawp maga let, ngwi pyaw na rai nga ai. Ga li ga law nga ai lam mung, nau n’nga ai, dai zawn ngwi pyaw ai dinghku dum n’ta masha ni hpang de, gadai mung sa dam kam na gaw teng sha re.

Matut nna, Hkum sai shan a matu sha myit nna yaw shada ai ningrum ningtau hpe lata na kun? Ngu ai hta, nang kaja wa sha, dai hpe lata hkrup jang gara hku hkam sha na kun? Hkum shan ra marin ai hte tsawra myit hte shut chye ai hpe myit dum ra nga mali ai nu wa ni. Tsawra myit hte hkumshan a ra marin ai lam gaw, kalang lang gumhpawn nna, byin chye ai nga ai. Grau nna sak naw kaji ai ten hta dai lam byin chye nga ai. Ga shadawn, naw kaji ai ten sumtsaw sumra a majaw, dum n’ta de n’wa gwi nna, dai shaloi jang hprawng lawm mat wa chye ai re. Jahkring mi na myit hta sha shut mat nna, dai kata kaw sha rawng ra mat ai dinghku ni mung nga nga mali ai re. Dai zawn re ai lam hpe gaw sadi, maja, myit dum nga ga, ngu mayu n’ngai. Bai Tinang hpe gaw grai tsawra ai, raiitm, tinang gaw, shi daram n’lu tsawra ai, dai zawn re hpe lata na kun ngu ai shaloi, dai zawn tinang hpe grai tsawra ai re majaw, lam shagu hta shi hkrai sha woi awn mat, tinang gaw, hpang hkan nang ai wa sha byin wa jang, gara hku hkam sha na kun? Kalang marang hkam sharang lu tim, law wa jang gaw, myit hta tinang hpe n’sawn ai zawn nga hkam sha na gaw teng sha re. Dai majaw ningrum ningtau lata na ngu ai shaloi, ga shadawn, hkrun lam hkawm ai shaloi, lam braw grai law ai kaw du ai ten, tinang hkawm sa na ban dung lam hpe lata hkawm ra ai zawn rai nga ai. Tsawra myit hpe madung da gaw de ra ai dinghku re majaw, dai tsawra myit gaw, ya ten ngang kang ai zawn, yet htawm hpang de mung ngang grin na matu a’hkyak nga ai. Dai majaw, hkungga ai nu wa hpu nau ni, ningrum ningtau lata ai shaloi, ga sadi dung ai wa, myit masin san seng ai wa, chye na chye madat ya ai wa, tsawra myit hta maju jung chye ai wa, makam masham hta ngang grin ai wa, shada da hkungga chye ai wa rai jang gaw kaja dik rai nga ai law.

 

Ka Lajang ai - Mama Rose Angeline Maran Nang Doi

                       RVA – Jinghpaw Nsen Shapoi Dap

                       Manila, Philippines.

 

 

 


Matut Mahkai Ga

Facebook