Hkungga tsawra ai nuwa hpunau ni, daini na lamang hta gaw, “Taw wa nga sai Ningbaw ningla kaja” ngu ai ginlam hte seng nna, gam garan ya na nngai. Nuwa hpunau ni, daini na prat masa ndai hta, gara shara kaw mi yu dat ga nga tim, ningbaw ningla kaja, kamhpa na masha nnga wa ai zawn rai wa nga sai gaw, anhte yawng mu lu na ga ai re. Hpa majaw, ndai zawn byin mat wa ai kun? nga yang, ya ten, ta tut hta woi awn nga ai ningbaw ningla ni nkau mi hkum nan shawang tsawra myit kata, myit htingkup nna, tinang a matu chyu myit mat wa ai majaw rai na re ngu yang nshut na re. Dai hku ngu yang, aw…ngai gaw ningbaw re, ngai a matu ntam la yang, n mahkawng la yang, ngai kan gyit da ra na kun? nga nna ga san ni tsun hpa shara re. Um…rai gaw re, raitim mung, gara shara, gara uhpung uhpawng hta mi raitim, ya daini na ten hta alaga shangun ai ngu ai hpa magam mung nnga mat wa sai hpe gaw, anhte yawng chye na ga ai re. Dai majaw, tinang shakut jang, shakut ai hte maren, akyu amyat shi hte shi lu la na sha re, KK Wa mung shaman ya na gaw teng sha rai nga ai. Raitimung, ya daini na ten hta gaw, dai masa lam hku nrai mat wa sai, ningbaw ningla nkau mi tinang lu la mai ai ahkawng ahkang gaw, yawng magawn la mayu ai, lawu tsang na ma ni hpe rai jang gaw, jan nna ahkaw ahkang jaw na nmyit mat wa sai. Dai gaw, myit hting kup ai lai ladat rai nga ai.

Anhte yawng chye lu na ga ai re, Moi na, sasana Jau ni, Sara ni gaw, anhte yawng a matu, ningbaw ningla ningshaw kaja ni nan re ai hpe anhte laika hkan hti nna mu chye lu nga ai. Raitimung, dai sasana Jau ni, Sara ni hpe dep dat ai, anhte a kaji kawoi ni nkau mi anhte a makau grup yin hkan naw nga na re, shanhte ni hkan mung, mai san la nga ai. Shanhte gaw, mai gan masha ni re, amyo sha ga nbung ai, malu masha nbung ai, katsi kahtet nbung ai, htung hking lai len, bu hpun mawn sumli ai lam ni du hkra shai ai shara hkan na du sa wa ai ni re. Shanhte a prat hta hpa mung, nra sharawng ai, nra kadawn ai, karai masa lam hte hpaji masa, machye machyang lam ni hta hpang hkrat taw nga ai anhte myu sha ni hpe, nkau mi shanhte a sak hpe du hkra ap nawng let, woi awn lai mat wa sai rai nga ai. Daini shanhte zawn re ai ningbaw ningla kaja ni anhte hta nnga mat wa sai re. Uhpung uhpawng shagu hta shang lawm nga ai uhpung shang masha ni, lawu tsang na ma ni, tinang hpe ahkum alum, kahpu kanau, dum nta masha langai hpe zawn woi lakawn la ai, yak tim, pyaw tim, rau sha lata gindun let, ra nga ai magam bungli hpe woi awn galaw chye ai, ningbaw ningla kaja hpe ala dingda nga masai. Ya daini, gara kaw ningbaw ningla kaja ni hpe mu tam la na kun? Jinghpaw ga malai, nau shawng wa shut jang hpang kaw hkang nang ai ni mung shut ai nga ai hte maren, shawang myit nnga ai, myit htingkup ai lai len masa hte up hkang ai ningbaw ningla a ma wa, ningbaw bai tai jang, shi a ningbaw wa a lai len raw bai rai sai. Dai majaw, ya daini woi awn nga ai ningbaw ningla nkau mi, tinang hkum nan shawng shading sharai la ra na ten du sai re ngu, mu mada nngai.

Anhte a matu, ningbaw ningla kaja kadai hpe kasi yu la na kun? nga yang, Madu Yesu Hkristu gaw ningbaw ningla woi awn ladat hte hpring tsup ai wa re, shi hpe kasi kamang yu la mai nga ai. Shi gaw, shi a kasa ni hpe woi awn hkawmsa ai lam hta ngai gaw ningbaw re ngu nna, ntsa tsang e galoi mung nnga ai, shi a sape ni hte kahpu kanau zawn, manaw manang zawn, nta masha zawn kanawn mazum let, woi awn lai wa sai rai nga ai. Nuwa hpunau ni, ningbaw woi awn hkawmsa ai lam hta lawu tsang na ma ni hpe anar power madun ai lam nre ai sha, ap nawng mayu ai myit masin hpring hte woi awn hkawmsa ai ningbaw ningla rai yang, ningbaw ningla kaja shi nan rai sai. Shi a woi awn ladat awng dang ai, hpang hkang nang ai ma ni mung, myit ngwi myit pyaw lam lu la na gaw, teng sha rai nga ai. Anhte ya daini na ten, ningbaw ningla kaja ni ngu tsun jahta dat sai hte rau, e…e… ya gaw, gara shara, gara uhpung uhpawng hta mi raitim, ningbaw ningla kaja ngu ai taw mat sai law. Mungkan ga ntsa hta e, tsadan mahtang shara la taw sam sai, ningbaw ningla hte lawu tsang na ma ni nru nra grai byin wa nga sai nga nna, tsun ai lam ni mung, na yu na ga ai. Kaja wa nga yang, anhte hkristan makam masham lu da sai ni rai ga ai majaw, Karai Kasang wa mung, tsadan a hpang de anhte hpe nhkan shangun sai, anhte mahtang she dai tsadan a hpang hkan nang, tsa dan a myit lai len lang nna, dinghta ga a, arawng aya, ja gumhpraw ni hpe myit maju jung nna, ningbaw ningla ni mung, lu ai hta lu mayu, lu mayu nna, masaw magaw hkalem hkalau lam de hkawmsa, lawu tsang na ma ni hpa byin yang byin, ngai nga pyaw jang rai sai, ngai dung shara lahkum atsawm re ai kaw lu dung nga jang rai sai ngu ai myit masa ni hte  she hpring tup mat wa nga sai gaw, anhte a myi chyaw hta e, ningbaw ningla nkau mi hpe mu mada na ga ai re. Hkunga ai nuwa hpunau ni, anhte myo sha ni hta, dai zawn rai nna, tingkyeng myit masa hte, ngai ngai nga nna, woi awn taw nga yang gaw, mungdan hpe woi awn ai mi rai rai, uhpung uhpawng hpe woi awn taw ai mi rai rai, nawku hpung hpe woi awn taw ai mi rai rai, lani mi teng sha hkrat sum lam de yawng mat wa na gaw teng sha rai na re hpe myit dum mai nga ai.

N grin ai dinghta ga ntsa hta jahkring mi nga law laman a matu sha myit nna, ningbaw ningla galaw mat na kun? shing nrai, tinang si mat wa tim, tinang ka mat wa ai labau, tinang a lam ni naw ngam taw nga nna, tinang a kashu kasha ni, makin jinghku ni, amyu sha ni a n gup hta naw tsun taw let, nja nhpra rai nga na lam hpe madaw lata la na kun? ngu ai gaw, anhte ya ten hta ningbaw ningla lit magam gun hpai nga ai ni hte  htawm de hpang de ningbaw shara hta lit la woi awn sa wa na ni myit dum sawn sumru ra ai lam rai nga mali ai. Ya daini na ten hta, masha kadai nmu ai shara, aten hta e, tinang galaw ra nga ai magam bungli ni hpe hkrap myi prwi hte yawng a matu shakut taw nga ai, myu sha hte nawku hpung a matu nga nna shakut taw nga ai, tingkyeng akyu hpe ntam ai sha, tinang a asak hpe pyi ap nawng hkra shakut taw nga ai, lawu tsang na ma ni a myi prwi, hkam sha lam, yak hkak lam ni anhte tau chye ya ra na aten du nga sai re. Nmu masu su taw nga ai lam ni, nchye masu su taw ai lam ni, ningbaw mying gun da nna, ahpa atang, apyaw angawn lahpyaw hpyaw dung nga ai lam ni, lawan myit malai na aten du sai. Shing gyim prat ngu ai hpa mung, n grin ai, ngai hpotni hpa byin wa na, kaning rai wa na, kadai tau chye nlu nga ai re. Hpotni hpawtna ningbaw ningla shara hta tsap sa wa na, ma ni a myit masin, kyang lai len ni hpe n jahten kau ya ga, mai kaja ai myit masa, mai kaja ai woi awn ladat ni hpe mahtang she dawk bang da ya ga, taw wa nga sai, ningbaw ningla kaja shara hta e, mai kam hpang gying ai ningbaw ningla kaja ni law law hpe bai kapa bang da lu hkra shakut let, hpawtni na anhte a mungkan hpe ngwi pyaw simsa ai mungkan byin hkra woi awn hkawmsa wa nga ga ngun shadum dat mayu nngai.

Hkungga ai Nuwa hpunau ni, lahta de gam garan lai wa sai hte maren, anhte marai hkum shagu mung, lani mi nrai yang lani mi, ningbaw galaw lai wa sai hte  matut nna ningbaw shara hta tsap ra na ni hkrai rai nga ga ai re, dai hpe myit dum let, anhte hkum nan mung, anhte a makau grup yin hta e mung, kam hpang gying ai, kam ram ai ningbaw ningla kaja ni law law paw pru wa u ga matu, lajang shajin sawa ga, lam woi awn lakawn la nga ga, hpaji jaw la nga ga, ngu gam garan ya dat lu nngai law.

 

Ka Lajang ai – Sara Joseph Maru La Nan

                        RVA Jinghpaw Nsen Shapoi Dap, Manila, Philippines.

 

 

Editor and Publisher by Joseph La Nan @ RVA

 

Page 1 of 4

Matut Mahkai Ga

Facebook