Hkung tsawra ai Ramma manaw manang ni, “Ramma hte Hpa Ji” ngu ai gin hpe gam garan ya mayu nngai. Shawng nnan, Ramma ngu ai a lachyum hpe yu yu ga. “Ramma” ngu ai gaw, Zet tsang kung kyang ai, Tinang hkum tinang myit ai hte maren byin hkra lu galaw ai, wang lu wang lang, lu hkawm lu sa ai, Myit marai hte hpring ai, Hkamja lam nga ai, Kaning re ai, hpaji ni hpe raitim, hka ja ai hte lawan ladan chye chyang loi ai, Bum tsaw shagawng kade mi tsan ai raitim, Bu hkawm sa na matu, n gun atsam hte hpring zup ai ni rai nga ga ai. Matut nna, “Hpaji” ngu ai hta gaw, anhte ni a laika hpaji jawng hta sharin la ngut sai, hpaji ni hpe sha tsun ai n rai nga ai. Kanbau magam bungli langai ngai hpe chye da ai, Ga shadaw: Mawdaw, Cycle Byeng, Gram ai, Laksama lata hpaji, Dum n’ta gaw gap hpaji ni hte kaga shingni hpaji ni mung law law shang lawm nga ai re.

Ya sha Tsun lai wa ai, Hpaji ni hta na, tinang gaw, hpaji langai ngai hpe chye chyang tawn da sai rai yang, tinang a kan bau magam bungli lu galaw ai hta n ga, makau grup yin a matu, akyu jaw ya lu nga ai. Ndai hpaji machye machyang ni hpe sharin hka ja la ai lam hta, nkau mi gaw, loi loi hte sharin la lu nga ai, bai nkau mi gaw, grai matsan ai majaw, hpaji sharin ai hkrun lam hta, myitru myit tsang, jam jau jam hkau lam ni hkrum katut let, sharin shakut la ra nga ai re. Ndai lam hte Seng nna, moi na, anhte a kahpu kawa ni gaw, laika hpaji chye la lu na matu, tinang a buga kaw na, laika sharin jawng kade mi tsan ai rai tim, jahpawt mi nmu shi yang rawt let, jawng sa shakut lai mat wa masai hpe anhte na lu, chye lu saga ai re. Ya daini anhte a prat hta, dai ram jam jau ai lam ni nau n nga na sai, hkawm wa hkawmsa na matu, layang ga de, rai yang, lagaw leng, madaw cycle ni jai lang mai nga sai re. Raitim, bumga de na, anhte a kahpu kanau ni gaw, ya mung Deng kade mi tsan tsan Laika hpaji jawng de lagaw lam sa let hpaji sharin la taw nga ma ai re. Ya na zawn, Kade mi jam jau tim, anhte chye chyang mayu ai hpaji ni hpe, hkam sharang let, shakut shaja la ra nga ga ai.

Anhte a ya ten shakut da ai a apu asi ni gaw, hpang e she di sha lu na rai nga ai. Kaning re ai hpaji mi sharin rin yak hkak ai lam gaw, loi li nga na sha rai nga ai. Ya daini anhte nang ngai Ramma ni, Mungkan a pyaw lam hta chyu len taw nga gaw, nmai sana re. Daini na Ramma gaw, hpawtni na ningbaw ningla nga ai hte maren, hpawtni hprani hta, ningbaw tai wa na, anhte Ramma ni, anhte a manu dan la ai Ramma prat hta chye da ra ai, hpaji machye machyang ni yawng hpe mai byin ai daram chye chyang kung kyang hkra, hkaja shakut shaja hkaja la nga ga. Daini na Mungkan gaw Hpaji hte gaw gap da ai mungkan she rai mat wa nga sai. Ga shadawn langai hpe yu ga, ndai Philippines mungdan na hpaji tsang madang hpe mungkan ting hkap la da ai, hpaji tsang madang re. Ndai mungdan hta, anhte wp buga na zawn Ja, Lung Seng n ngai ai rai tim, Hpaji chye sai Ramma ni, tinang a mungdan hta sha n ga, maigan mungdan de, magam bungli sa galaw ai ni law law hpe mu lu nga ai. Mai gan mungdan de, bungli sa galaw ai ngu ai hta, mungdan atsu ya ni kawn Dat nna, Bungli sa galaw shangun ai ni mung nga nga ma ai, Dai bungli sa galaw ai ni gaw, laning mi hta, Asuya hpe kade ram shagun ya ra ai nga nna, masat tawn da ya nga ai. Dai majaw ndai Philippines Mungdan gaw, hpaji hpe grai manu shadan jai lang ai, mungdan langai mi re. Ya na zawn, ndai mungdan a hpaji gaw, grai madang tsaw ai hte ta tut hta mung, mai jai lang ai re majaw, kaga mungdan shara shagu na ni, laika hpaji sa sharin hka ja la nga ma ai. Ya sha Tsun lai wa sai hte maren anhte Ramma ni mung, maigan mungdan de mi nrai tim, tinang a mungdan hta hkaja la mai ai, hpaji ni grai nga nga ai re.

Kaning re ai hpaji hpe mi raitim, sharin la na ahkaw ahkang nga wa jang, sharin hkaja la na matu, nmai lagawn ai. Hpaji gaw, manu daw dan nlu ai, Ja Lungseng hta grau reng nga ai. Dai rai yang, nkau Ramma ni, Ya ten hta Jawng laika hpaji sharin na ten, hkauhting hkauna galaw sha ra ai, hkaisun magam bungli ni hpe galaw ra ai a majaw, laika hpaji sharin na ten n nga ai, nga nna, myit npyaw mung nmai rai ga ai. Dai magam bungli ni mung, anhte a prat a matu, hpaji ni rai nga sai re. Ya daini anhte a wp buga shara shagu hta, hpu nau myu sha ni hkrai, Yi sun, hkau na galaw sha ai lam ni grai nga wa sai hpe, anhte a myi chyaw mu lu na ga ai. Hpa majaw shanhte zawn, anhte mung, Yi sun, hkau na ni nchye galaw sha ai kun? nga yang, ya kaba wa ai, anhte Ramma ni, magam bungli nkam shakut ai, nkam hka ja ai, Jawng laika hpaji hpe sha, hpaji madung shadu ai, kanu kawa ni kaw na, hpaji hkring htawng ni rai nga ai, Ga shadaw: Kaji, Shingnoi, Singga wa ai, da da ai zawn re ai hpaji ni hpe nkam sharin la ai, madang dep ai hpaji n shadu ai. Kaja wa nga yang, ya sha tsun lai wa sai, hpaji ni gaw, mari la nlu ai hpaji ni re, maigan mungdan hkan nga yang gaw, dai zawn re ai, htung hking arung rai ni grai manu hpu la nga ai re.

Dai hte maren ya daini anhte Pa layang ga de, hpu nau myu sha ni, lung wa nna, anhte a buga hkan tu nga ai, Ri, Dong-goi, Pali kawa ni hpe wa lahkawn, wa shaw la mat n’htawm, shanhte hkum nan jahtai, singga, shingnoi ni galaw nna, bai wa dut hkaw hkawm re ai hpe yawng mu lu na re. Anhte a buga hta tu nga ai hpe anhte bai mari lang ra ai madang rai wa nga saga ai. Ndai lam ni gaw, shanhte a hpaji ni rai nga ai. Dai hpaji ni hpe Anhte Ramma ni kasi la mai nga ai, Kaning re ai hpaji mi rai tim, chye da ai rai yang, Kaman li la nrai mat na re hpe myit hta bang da nga ga. Matut nna, maga mi de bai yu dat ga nga yang, prat dep laika hpaji chye chyang ai anhte Ramma ni mung, hpaji lam yan hta naw hpang gara, ra kadawn nga ai, anhte a wp mungdan Bumtsaw shagawng, Karing Kahting hkan shanu nga ai anhte a kahpu kanau ni a matu, myit sawn tawn da na mung mai kaja htap htuk la nga ai re.

Anhte shada da hpaji lam yan hta npawn ba la hkat yang, masha myu wa, sa garum la na, nrai nga ai. Ngai a mahkrum madup hpe tsun dan ga nga yang, kalang mi Wasaradaw hte hpung gawan hkrun lam hta re, (7) ning ram rai sai, ma kasha langai hpe mu hkrum nna, “kanau ya tsang kade lung taw ai rai” ngu san dat yang, “anhte Buga hta hpaji jawng nnga shi ai”nga nna, htai dan wa ai. Kaja wa nga yang, ma kasha dai gaw, laika hpaji jawng de sa ra sai ten rai nga ai. Dai majaw tsawra hkungga ai Ramma manaw manang ni, anhte Nang ngai chye da ai hpaji n gun atsam ni, Na matu hkrai sha n-rai mat u ga. Ya ten, Bum tsaw n-tsa hkan naw rai nga ai ni, Jawng nau tsan ai majaw, jawng n-lu sa ai kahpu kanau ni, Jawng lung shabrai nlu ai majaw Jawng nlu sa ai ni, tinang a pye mare buga hta laika sharin jawng n nga ai majaw jawng nlung ai ni, Bum yi galaw sha n-na salu salat kahtan ntsa kaw na, lagaw ndung de du hkra hkrat let galaw sha ra taw nga ai, anhte a kahpu kanau ni mung grai naw nga ai hpe myit dum la mai nga ai re. Dai majaw tinnag chye da ai hpaji gaw, yawng a matu, manu dan htap htuk ai hku nna, jai lang sa na mung ahkyak nga ai re. Ga shadawn, anhte Ramma ni, nang hpam malu masha hte pyaw len let, Karai jaw da ai manu dan la ai, Ramma prat ni hpe jahten let sak hkrung hkawm sa taw nga ai lama rai yang, hpawtni ngu na, anhte a prat masa gam maka gaw, yawn hpa lam sha rai mat wa na re.

Hkungga tsawra ai Ramma manaw manang ni, lahta de tsun lai wa sai hte maren anhte Ramma prat hta chye da ra ai, hpaji machye machyang ni hpe mai byin ai daram hkaja da let, anhte chye da ai hpaji ni hpe, nawku hpung a matu, myu sha ni a matu, matsan mayan rai nga ai, kahpu kanau ni a matu, manu dan ai hte jai lang sa wa nga ga. Dai rai yang, anhte kahpu kanau ni, hpaji chyechang kung kyang ai ni lani hte lani grau grau law htam wa lu na re ngu garan kachyan ya dat n nga ai law.

 

Ka Lajang ai – Sara Joseph Maru La Nan

                        RVA Jinghpaw Nsen Shapoi Dap, Manila, Philippines.


Matut Mahkai Ga

Facebook