Hkungga tsawra ai ramma manaw manang ni, “Ramma hte Ja Gumhpraw” ngu ai ga baw hte seng nna, gam garan kachyan ya mayu nngai. Tsawra ai ramma manaw manang ni, lai mat wa sai ten ni hta ramma a manu hpe sang lang dan chyalu rai sai re. Ya matut nna, Ja gumhpraw a manu hpe bai sawn maram yu ga. Ja gum hpraw gaw – anhte Ramma ni a chye da ra ai, hpaji lam magup sumhpa hpe jaw ya lu ai, tinang sa mayu ai, du mayu ai shara de, du shangun ai, machyi makaw hkrum ai ten hta shamai shatsai ya lu ai, dum nta kun dinghku masha ni hpe myit shapyaw ya lu ai hte anhte a myit hpe mung shapyaw ya lu nga ai. Tsun lai wa sai lam ni hte hpring zup nga ai, ja gumhpraw gaw anhte ramma ni a prat hta mung, grai ra ahkyak ai hta lawm nga ai re. Ja gumhpraw hpe kaja ai hku nna, jai lang chye yang anhte a prat hta akyu law law jaw ya lu nga ai.

Ya daini, ja gumhpraw lu lawm ai ni a matu, laika hpaji sharin la na, grai loi ai raitim, nlu nlawm, matsan mayan ni a matu gaw, laika hpaji sharin hkaja ai lam hta nloi la nga ai re. Dai majaw, ginhtawng jawng dat ten hta ja maw sa, ri gawng ai magam bungli hte kaga gumhpraw lu mai ai mgam bungli amyu myu ni hpe galaw shakut let, jawng lung shabrai hpe tam shakut nga ai, tsawrai ramma manaw mannag ni mung law law rai nga ai re. Yana zawn shakut nga ai, ramma ni gaw, ja gumhpraw hpe grai akyu rawng ai hku nna, shanhte a laika hpaji sharin ai hkrun lam hta jai lang akyu jashawn ai lam rai nga ai. Raitim mung dai lam a maga mi de bai shingdaw yu yang, Ja gumhpraw hpe kaji ten kaw nna, jai lang lu ai, Jawng sa ai ten shagu hta kanu kawa ni kaw nna, muk manu jaw shaman ai, sha mayu ai mari sha lu ai, ra ai arung arai, bu hpun palawng ni hpe, hpyi shagu kanu kawa ni mari jaw ai, hpa myit ru tsampu nra ai kashu kasha ni gaw, kaba wa ai ten hta, shanhte a laika hpaji sharin hkaja ai lam hte bawng ring rawt jat galu kaba wa na lam ni hta hpang hkrat ai lam ni byin wa chye nga ai.

Ndai lam hte seng nna mabyin langai mi gam garan ya mayu nngai, “Mare kahtawng langai kaw, la kasha shingtai sha lu ai, kun dinghku langai mi nga ma ai. Shannu wa ni gaw, lu na sha na, bu na hpun na tsang nra, hpring zup nga malu ai. Kasha asak ram wa nna, laika sharin jawng de sa ten du sai, shaloi Kasha gaw, jawng nkam sa ai nga nna, hkrap ai, hpa majaw, nga yang, dum nta kaw nga yang, laika nsharin ra ai, kanu yan kawa hte pyaw pyaw lu nga ai a majaw rai nga ai. Raitim, kanu yan kawa gaw, kasha laika hpaji chye u ga matu, nang jawng sa jang, muk manu jaw na yaw ngu shalen nna, jawng de sa sa masai. Ndai zawn shani shagu, muk manu jaw ai gaw, hpang daw hta kasha a matu, akyang hpa rai mat wa nga sai. Muk manu njaw jang gaw, jawng nsa ai… nga nna, kanu yan kawa hpe bai nhtang tsun aput chye wa nu ai. Kanu yan kawa mung, kasha hpaji chye na matu she re gaw… nga nna, kasha hpyi shagu jaw nga manu ai. Raitim, shaning ten ni na wa ai hte shan a kasha mung, mare na, lawu tsang jawng hpang jahtum lung ai shaning ngu na hta gaw, kanu yan kawa, ja gumhpraw yak hkak ai lam ni nga wa ai majaw, muk manu nlu jaw wa masai. Shaloi kasha gaw, shani shagu, muk nlu mari sha, gum hpraw nlu lang rai wa ai majaw, jawng nkam lung sai, ngai gumhpraw tam sana nga nna, jawng laika sharin la na ten, jawng nlung mat sanu ai. Yana zawn, ja gumhpraw lu mai ai magam bungli hpe hkan tam galaw nga sanu ai…. shi lu tam la ai ja gum hpraw ni gaw, tam dat, jai lang dat rai nna, mahkawng tawn da na mung nnga, kanu yan kawa hpe jaw na pyi nlawm nga nu ai. Dai shaloi n grin ai mungkan a ja gumhpraw a manu hpe bai sawn sumru lu wa ai shaloi, laika hpaji jawng bai lung mayu ai myit ni rawng wa nu ai. Raitim, dai ten hta shi a asak prat gaw, laika sharin jawng sa na ten nrai mat nu ai, myit malai tim hpang hkrang mat sanu ai.” Tsawra ai ramma ni, ya sha, tsun lai wa sai, mabyin hta madung gaw, anhte a kanu kawa ni rai na re… kashu kasha ni hpe nau tsawra ai majaw, nau awn ai majaw, kashu kasha ni a laika hpaji hkaja ai lam hte rawt jat galu kaba na lam ni hta hkra machyi wa shangun ai hpe nmai malap kau nga ga ai. Dai Majaw asak 5 ning kaw nna, 11 ning lapran na, kashu kasha ni hpe ja gumhpraw jaw lang ai hta shadawn sharam let, jaw lang yang grau kaja na re. Matut nna, kashu kasha ni hpe mung, ja gumhpraw hpe gara hku nna, tam la ra ai, gara shara hkan jai lang ra ai, kaning re ai shara ni hta gaw, nmai jai lang ai, dum nta a shang gumhpraw ya kade nga ai, shang gumhpraw hta na, kade ram hpe, dum nta masha ni a matu, malu masha mari sha ai hte ra rawng ai lam ni hta jai lang nga ai, ngu ai lam ni hpe, kashu kasha ni chyena hkra tsun dan ra nga ai. Dai shaloi, kashu kasha ni, ja gumhpraw a lam asan sha chye na wa ai hte shanhte a prat hta Ja gumhpraw hpe atsam sha chye jai lang wa na rai nga ai.

Tsawra ai ramma manaw manang ni, Lahta de, tsun lai wa ai hta laika hpaji sharin ten ladaw hta ja gumhpraw a majaw, hkrum ra ai, lam ni hpe na la lu saga ai. Ya gaw, jawng ma prat ten laika hpaji sharin hkaja la ai ladaw hta, ja gumhpraw a majaw, jaw ya lu ai akyu ni hte hpyen ni hpe bai maram yu ga. Ja gumhpraw gaw, anhte ramma prat ten hta chye da ra ai, hpaji machye machyang lam amyu myu hpe jaw ya lu nga ai hte anhte a ramma prat hpe rawt jat galu kaba ya lu nga ai. Ndai lam hte seng nna, ngai a manang langai mi nga ai, shi gaw, Dakksu jawng ngut ai ten hta, kanu yan kawa galaw nga ai, magam bungli hpe shi hkum nan shakut hkawmsa ai, Ja Gumhpraw hpe majoi njai lang ai, Kanu yan kawa galaw hpangda ya ai, sut masa magam bungli hpe nsum mat hkra, ngang grin nga hkra matut shakut hkawmsa ai. Ja gumhpraw hpe kam ai daram jai lang lu ai raitim, shi ja gumhpraw jai lang na rai yang, kanu yan kawa kaw ahkang hpyi nna, she jai lang ai. Kaji ten kaw nna, Kanu yan kawa a sharin shaga ai npu hta nga kaba wa ai majaw, Ja gumhpraw kade mi lu tim, shi a prat hten za ai lam de ndu ai sha, grau rawt jat ai lam de du mat wa ai. Tsawra ai Ramma manaw manang ni, ya sha tsun lai wa ai, mabyin zawn anhte a prat hpe mung shading sharai la mai nga ga ai. Dai hta n ga, ja gumhpraw gaw, Chyinghkai kanu kawa ni hpe myit shapyaw ya lu ai, Jam jau nga ai, anhte a manaw manang ni hte matsan mayan hkrum kaw si hpang gara hkrum sha nga ai hpu nau ni hpe mung, garum shingtau ya lu nga ai. Dai majaw, Ja gum hpraw hpe mai kaja ai hku nna, jai lang ai rai yang, anhte a prat a matu mung, makau grup yin hkan na, ra kadawn nga ai ni hpe mung akyu jaw ya lu nga ai re.                                                 

Bai nna, Hpang jahtum, Ja gumhpraw a majaw, du wa lu ai hpyen ni hpe bai maram yu ga, Ja gum hpraw lu yang, anhte ramma prat hta, hkum hkrang a matu hpa akyu njaw ya ai, nanghpam tsi mawan ni hpe mari lu ai, mungkan a tang pyaw lam ni hta jai lang shama kau ai. Ndai nanghpam tsi mawan hpe, chyam hpang ai kaw nna, kalang kaw nna, lahkawng lang nga nna, matut manoi, nlu lang yang nmai rai wa ai madang de du mat wa nna, tinang hta lu da ai, ja gumhpraw kade mi nga tim, jahkring mi hta sha ma kau chye nga ai. Tinang a ja gumhpraw ma jang, kanu kawa ni kaw hpyi na, kanu kawa ni kaw na, nlu jang, lagu lagan let, lu lu hkra, lu mari la hkra, shakut wa ai. Ndai lam ni gaw, tinang a ja gumhpraw tinang hpe tsinyam jaw ai lam rai nga ai. Nanghpam lu sha ai a hpung dim gaw, hkum hkrang hkamja lam de pyi hkra machyi wa shangun ai hte tinang a gumhpraw hte ana ahkya hpan hkum hkra hpe, hkum nan mari la ai hte mung bung nga ai. Dai hta n ga, Ja gumhpraw grai lu su ai rai yang, hkawmwa hkawmsa pyi grai sadi ra nga ai. Ja gumhpraw myit marin ai ni tinang a asak hpe gyam sak ai du hkra byin wa chye nga ai. Dai majaw, ja gumhpraw a majaw, du wa na hpyen ni hpe mung, rai ndu shi ai kaw nna, makawp maga kau gaw, grai ahkyak la nga ai re.

Tsaw ra ai Ramma manaw manang ni, lahta de tsun lai wa sai hte maren, anhte a ramma prat hta Ja gumhpraw a majaw, jaw ya lu ai, akyu chyeju ni hte ja gumhpraw ai majaw, du wa hpyen ni hpe atsam sadi maja, maram shingdaw let, anhte a manu dan la ai, ramma prat hpe matut shakut hkawm sa wa ga ngu, n gun jaw, garan kachyan ya dat lu nngai law.

 

Ka Lajang ai – Sara Joseph Maru La Nan

                         RVA Jinghpaw Nsen Shapoi Dap, Manila, Philippines.

 

 

 

 


Matut Mahkai Ga

Facebook