Hkungga Tsawra ai Ramma manaw manang ni, “Ramma Hte Nanghpam Tsi Mawan” ngu ai ginlam hpe gram gam garan ya mayu nngai. Tsawra ai ramma manaw manang ni, Ramma prat gaw, Kanu Kawa ni a shimlum la ai shingnip singkaw npu kata hta shanu nga let, myit ru myit tsang lam n nga, pyaw la dik ai aten mung rai nga ai. Dai hta n ga, Nawku hpung magam bungli, Mare magam bungli hte dinghku kata na magam bungli ni hta mung, n gun atsam marai hpring hte shakut, garum ya lu ai aten mung rai nga ai re. Ya na zawn, myitru tsam pu lam n nga ai ten re majaw, tinnang a shawng lam prat a matu, npawt nhpang gawde ra ai aten mung rai nga ai. Ndai zawn, anhte a tsawm htap la ai, hpa hte mung galai la nlu ai, manu dan la ai, ramma prat hpe marawp sha taw nga ai hpen kaba gaw, ya daini anhte a n gup hta galoi tsun nga ga ai, nang hpam tsi mawan nan rai nga ai. Ndai nang hpam tsin mawan ngu ai hta, tsa, malut hkayawm, Kani Chyang, Kani Hpraw, Yama, Formula hte kaga hpan amyu myu ni naw lawm nga ai re.

Lai mat wa sai, shaning law law aten hta gaw, ndai nanghpam tsi mawan ni hpe, hpun asi hkan na shaw la nna, sung lang lai wa sai lam hpe mu chye lu nga ai. Bai tsa chyaru hpe, anhte a mungding tsi hkan mung, loi loi gaw, sung lang ai hpe gaw, yawng mu chye na nga ga. Raitim, ya daini gaw, Prat lahkam dep wa ai hte rau, Dat tsi ni hpe sung lang nna, gayau htut shapraw wa nga, tsi tawng, tsi ntsin, tsi shamun ni gaw, sinak pala hta grau hkrit ra ai gung kaba nib yin wa nga sai. Ndai Dat Tsi hte htuk shapraw ai nanghpam tsin mawan ni hpe lu sha jai lang ai a marang e, anhte a myit nyan marai ni hpe shayawm kau ya lu ai, ndum ndam rai wa shangun ai, tinang a tsun shaga, hkawmsa hkawmwa lam ni hpe du hkra yawng galai shai kau ya lu nga ai. Ya daini ahte myu sha ni yawng a yawn hpa langai mi gaw, sak naw ram nga ai, ramma ni law malawng ngu na ram, ndai nanghpam tsin yam panglai hta hka hpung yawt taw nga ai ni grai law wa nga saga ai. Bai nna, jawng lung aten naw ram nga ai ramma ni mung, nanghpam tsi mawan hpe sha madung tawn da let, jawng laika ni yawng hpe shingdu tawn da masai.

Anhte a Nu Wa ni gaw, laika hpaji chye chyang wa mu ga, nga nna, shanhte hpa nlu lu, nlu sha rai tim, kashu kasha ni hpe laika hpaji jawng de sa tawn da ya sai re. Ndai lam ni yawng hpe, ya daini anhte ramma ni myit hta galoi mung bang da let, hkawmsa ra nga ga ai. Tsawra ai ramma ni, anhte nang ngai myu hpe tsaw ra ai rai yang, mung hpe tsaw ra ai rai yang, ndai nanghpam tsi mawan ni hpe koi gam ra saga ai. Ya daini na aten hta anhte a myu mare kaba hkan sha nrai, mare kahtawng ning chawng, shara shagu hkan du hkra, nanghpam tsi mawan ni du taw nga sai re. Ndai Nanghpam tsi mawan ni gaw, hpu nau myo sha ni, anhte myo sha ni yawng htum mat wa mu ga, yaw sahda let, katsi majan hku nna, kasat taw nga ai re hpe dum hprang ra saga ai. Ndai nanghpam tsi mawan lu sha jai lang ai a akyu gaw, hpa mung nnga nga ai, lu tawn da ai, ja sut gan htum mat wa shangun ai, hkum hkrang hpraw nsam galai shai mat wa ai hte hkamja lam hpe du hkra, hkra machyi wa shangun lu nga ai. Dai hta n ga, Nu wa ni a myiprwi jahkrat ya ai hte dinghku kata mang hkang shabyin ya ai mung, nanghpam tsi mawan sha rai nga ai re.

Bai nna, ndai nanghpam tsi mawan hpe hpa majaw, lu sha jai lang nga ga ai kun? ngu ai hpe maram yu ga nga yang, nkau mi gaw, kanawn manang nkaja ai hte hkrum katut ai majaw, Bai nkau mi gaw, myitru myit htum ai majaw, jinghpaw ga malai, chyan yu ngu yang, kadawng bang ai ni grai law nga ga ai. Dai hta n ga, nkau mi gaw, dum nta kun dinghku kata shada nru nra rai nna, myit htum a jum, hkrup ai shara de hkawmsa hkawm ai majaw, hpang jahtum gaw, nanghpam tsi mawan a mayam tai mat wa ai ni mung lawm nga ga ai.

Tsawra ai ramma manaw manang ni, nanghpam tsi mawan hpe lu sha na matu, manaw manang ni, gunglau wa ai ate hta mung, myit hpe hting hkang da nga ga, bai nna, lam n kaja ai de hkawmsa nga ai, manaw manang ni hpe lam kaja de bai woi sa la nga ga. Ndai Nanghpam tsi mawan kaw na, lawt lu na matu, ahkyak madung gaw, anhte a myit masin lak nak re. Ndai lam hte seng nna, ngai a manang langai mi a mabyin hpe tsun dan mayu nngai, shi gaw, ya na Formula ngu ai lu sha nga ai wa re, shi dai tsi mawan hpe gaw, Dakksu jawngma prat aten kaw nna, lu sha jai lang hpang nga sai.

Ya na zawn, Dakksu jawng ni mung ngut nna, Ramma ni hpe woi awn let, nawku hpung a magam bungli hpe shakut hkawmsa taw nga ai. Lani mi hta gaw, ramma sharin dabang hpaw na hkyen taw nga masai, dai hta shi mung, Ramma hte Nanghpam tsi mawan ngu ai ga baw hpe sharin ya na hkyen taw nga nu ai. Dai shaloi shi hkum nan lu sha jai lang nga ai, ndai nanghpam tsi mawan a lam hpe sharin ya ra ai majaw, gara hku nna mung nmai byin ai lam rai nga ai i….. shaloi shi rung gawk kata mau dung taw nga ai…. ndum shami rai yu dat ai shaloi… shanhte a rung gawk shakum hta ka shakap da ai….. (Esia 43:5) kaw na… Hkum hkrit et, ngai nang hte rau rai nga nngai…. nga ai chyum mungga daw hpe shi mu hti dat wu ai hte rau… aw…. karai Wa ngai hpe n kabai kau da ai sha, ngai hte rau sha she rai nga ai ngu…. myit la let, dai ni kaw nna gaw, ngai ndai nanghpam tsi mawan hpe tawn kau sana re, nga nna, tawn kau sanu ai. Dai hta n ga, dai ramma dabang hta mung, shi hkum nan yawng a kasi tai let, shi a prat mahkrum madup hte hpawn ramma ni hpe sharin ya sanu ai. Tsaw ra ai ramma ni, ya sha na la lu sai, manang wa a mabyin hpe anhte mung, kasi la mai nga ga ai re, anhte a myit hpe dang ai rai yang, hpa lam mung, mai byin nga ai, nmai byin ai lam ni gaw, ndai dinghta ga ntsa hta hpa mung n nga ai nga nna, laika ka Sara ni hkum nan tsun da nga ma ai re.

Tsaw ra ai ramma manaw manang ni lahta de tsun lai wa sai hte maren, anhte hpe hpa akyu mung, njaw ya lu ai, hkrit tsang ra dik ai nanghpam tsi mawan a tsin yam kata de, n shang wa u ga, koi gam let, myu sha ni a matu, nawku hpung a matu, kun dinghku a matu, akyu rawng manu dan ai kashu kasha ni byin tai wa lu hkra shakut hkawm sa wa ga ngu, n gun jaw, garan kachyan ya dat lu nngai law.

Ka Lajang ai – Sara Joseph Maru La Nan

                        RVA Jinghpaw Nsen Shapoi Dap, Manila, Philippines.


Matut Mahkai Ga

Facebook