Sumtsan Buga, Bum lang hkaraw nhkap, maling mala hkan nga hkawm nna, kanu kawa ni hte kade mi tsan gang tim, RVA nsen hpe sha lu mdat nga yang gaw, kanu kawa rau nga ai zawn ngu myit dik myit pyaw ai lam lu la n’ngai dai majaw, RVA gaw, ngai a matu, n nga nmai ai chyeju madu langai rai li ai. Dai majaw, lamang hpe shapoi ya nga ai, RVA hte RVC magam gun ni yawng hpe grai chyeju dum nngai law. 
(Sh.d Petru Shayem Naw Naw, Sumprabum, Myoma Lawk) 

 

RVA Jinghpaw Nsen Lamang ni hpe galoi mung, madat hkam la nga nngai. RVA lamang gaw, ngai a matu sha nrai, Jinghpaw Myu sha ga chye na ai ni yawng a matu, “N Wai Pan” Shiga shapoi dap langai mi nan rai nga ai.
(Slg. Luka La Tsan Naw Awng, Mogaung Jau Ginwang, Namti, Shweli Lawk) 

 

RVA kaw na, Ma Ma shapoi ya nga ai, hkai rem lamang hpe hkap madat la nna, ngai hkum nna, nta kaw mung, bumyi de mung, nam pan ni hte si mai si maw ni hpe hkai da ai majaw, jum, sau, shan ni hta lai nna, kaga mi mari sha nra ai, kashu kasha ni a matu mung, grai akyu rawng ai, nam pan ni hpe nawku jawng de alu sa bang lu ai hte dum nta na, nawku tawn hta mung, ten tup ngu na, nam pan hte mawn sumli da lu nngai. Dai majaw, RVA shiga madat ni yawng, RVA lamang hpe, majoi n madat shalai kau ai sha, ta tut hkai sha yang, dinghku a matu, gumhpraw gayun ai shara pat lu na rai nga ga ai ngu, shadum dat nngai law. 
(Sarama Usa Teresa Avila Gawlu Kai Bren, Sumprabum, Myoma Lawk) 

 

RVA hte RVC magam gun ni yawng, ngwi pyaw hkamja nga myit ga, shawng nna, kyu hpyi shakram dat n ngai. Rva de, laika hte dingngam nlu matut mahkai ai raitim, shapoi ya nga ai lamang ni hpe gaw, tut nawng madat la nga nngai. Prat hta hkan nna, nsen ni hpe shapoi, shachyam shabra ya lu hkra, lam woi matsun madun ya nga ai, hpan madu hpe tut nawng chyeju dum nga n’ngai. Bai mgam gun ni yawng a ntsa, ra nga ai shaman chyeju Karai Wa tut e, jaw ya nga u ga. Rva lamang ni hpe madat shalai kau ai hku nre ai sha, ta tut hta jai lang akyu jashawn nga nngai.

Radio langai hta lang yang, kaning re ai, nam maling kata de du mat wa tim, tinang a makau kaw nna, hkaw tsun shaga nga ai zawn, hkap madat la lu nngai. Hkrun lam hkawm sa nga ai ten, (6) ya hte laban shani ni hta, rva mdat let, myit hpe shadik la nga nngai. Laban shani hti ang ai Ja chyum mungga ni hpe (6)ya shani hta tau nau gam garan ya ai majaw, nawku jawng nsa lu ai ten hta raitim, mungga hpe chye na hkam sha myit dik lu n’ngai. Jinghpaw myu sha ga hku nna, nsen shapoi dap ni kade mi law jat wa ai raitim, RVA nsen gaw, n madat nmai ai daram rai nga ai. Teng mai ai lam hpe hkaw tsun ai majaw, madat yang grai n gun lu nngai. Yak hkak ai lam law tim, matut shakut lu mu ga, buga hpung masha ni yawng a gawng malai, n gun jaw let, kyu hpyi ya nga ding yang rai nga n ngai. Madu Yesu lam shawng ya ai, nu maria kyu hpyi garum ya ai hte san pra ai ni yawng a kyu hpyi garum ya ai gaw, magam gun ni hte anhte shiga madat ni yawng a ntsa tut nawn ge, a nga nga u ga ngu, kyu hpyi dat ai law. 
(Sara Thomas Cici Htang Wa, Manmaw Jau Ginwang, Sinna Mali Hkran, Nawng Sin, Aung Tar Yar Mare)


Matut Mahkai Ga

Facebook