Shiga shapoi ai ngu nna tsun ai hta ahkyak ai lam hpan masum lawm nga ai. Dai ni gaw, shiga madat ni hpe shiga jaw ya na matu, hpaji jaw shapan shalat ya na matu hte shangwi shapyaw ya na matu rai nga ai. RVA Jinghpaw nsen shapoi dat kaw nna mung ndai ahkyak ai hapn masum hpe galaw nga ga ai. Ahkyak dik hku nna gaw madu yesu a kabu gara ai shiga hpe shiga madat ai ni hpang de shalai ya ai lam rai nga ai. 

Kabu gara ai shiga hpe shachyam shabra ai magam hku nna RVA Jinghpaw nsen shapoi dat gaw shani shagu na ja chyum mungga ni hte myit sum ru akyu hpyi ai lam kadun galaw ya ai, makam masham hkaja ai lamang shapoi ya ai, nawku hpung labau, san pra ai masha ni a labau ni, san ga mahtai, saradaw ni a ahkyak ai mungga ni hte laban shani shagu na mung ga ni hpe shapoi ya ai. Shiga jaw ya ai lamang ni hku nna nawku hpung shiga hte buga shiga ni hpe shapoi ya nga ai zawn buga ndau lamang ni hpe mung shapoi ya ai. Hpaji jaw sharin shapan shalat ya ai lamang ni hku nna hkam ja lam, hpaji ning li lam, htung hkying lam, hkai lu hkai sha lam, kun ding hku hte ram ma lamang ni, bai chye chyang ai myit su ni hte hkrum shaga ai lamang ni hpe shapoi ya ai. Shangwi shapyaw ya ai lamang ni hku nna gaw mahkawn kum hpa lamang hta buga shakawn mahkawn ni, nawku makam masham mahkawn ni hte sum tsaw sum ra mahkawn ni mung shapoi ya ai. 

Kaga mung kan shiga dap ni gaw madung hku nna mung kan shiga, mung masa shiga ni hte shangwi shapyaw ai lamang ni hpe madung da shapoi nga ma ai rai tim, RVA shiga shapoi dap gaw Kahtawlik nawku hpung a makam masham hte seng ai shiga shapoi dap rai nga ai majaw RVA Jinghpaw nsen shapoi dap hku nna makam masham hte seng ai lam ni hpe madung da nna shapoi ai. Dai re ai majaw RVA Jinghpaw nsen shapoi dap lamang yawng a tsa htam shadang 60 gaw makam masham hte seng ai lamang ni, tsa htam shadang 25 gaw sharin shapan shalat ya ai lamang ni, tsa htam shadang 10 gaw shiga jaw ya ai lamang rai nna tsa htam shadang 5 gaw shangwi shapyaw ai lamang rai nga ai. 

 

Kabu gara ai shiga shachyam shabra ai lamang ni (Evandelizing Programs) 

Myanmar mung dan hta BBC, VOA, RFA, DVB bai asuya madu ai Radio shiga dap ni hte FM nsen shapoi dap ni law law nga ma ai, rai tim mung ndai shiga dap ni kaw nna madung da shapoi ya ai lamang ni gaw mung kan shiga ni, mung masa lam ni hte shangwi shapyaw ya ai lamang ni chyu sha rai nga ai. Ndai Radio shiga dap ni hta Karai Kasang a mungga hpe shapoi ya ai shiga dap nlawm nga ai. Maynmar mung dan hta shanu nga ai mung chying sha wan 60 daram nga ai kaw nna wan lahkawng jan gaw hkristan ni rai ma ai. Ndai hkristan ni malawng maga gaw amyu bawng sang ni rai nna matut mahkai hkawm wa hkawm sa yak hkak ai shara ni hkan shanu nga ai ni rai ma ai hte nkau shara ni hta gaw Radio hta lai nna kaga shiga hkap la lu mai ai matut mahkai lam ni hpa mung nnga ai shara ni rai ma ai. Dai re ai majaw RVA Jinghpaw nsen shapoi dap kaw nna Karaia Kasang mungga hpe hakp madat la mayu ai mung chying sha ni a matu Karai a mungga hpa madung da nna shapoi ya nga ai rai nga ai. Mung chying sha ni ala madat mayu ai Karai a mungga ni hpe shapoi ya nga ai shiga dap rai nga ai majaw RVA Jinghpaw nsen shapoi dap gaw wun pawng sha ni ra sharawng dik ai radio shiga dap tai nga ai rai nga ai. Ndi zawn re ai lam ni majaw RVA Jinghpaw nsen shapoi dap gaw wun pawng sha ni a matu lak lai ai shiga dap mung tai nga ai rai nga ai. Shani shagu na Ja Chyum Mungga: Shani shagu hti ang ai ja chyum mungga hpe hti shana ya ai hte myit sum yu mai na lam ni hpe shani shagu minit 2/3 daram shapoi ya ai. 

Laban shani na mungga: Tsaw tsan yak hkak ai shara buga ni hkan magam gun nga ai Jau ni tara hkaw sara sarama ni madat la nna hpang shani na laban shani a matu lajang shachyip ai lam hta garum la lu na matu yaw shada nna laban shani na mungga htawn ai lam hpe kyu ya shani jahpawt shana shapoi ya ai. Ndai lamang hta laban shani na kabu gara ai shiga hpe hti dan ai de a hpang mungga htawn ai, de a hpang mungga hte la kap ai nawku mahkawn hpe shapoi ya ai rai yang ndai lamang minit 20 daram aten la ai rai nga ai. 

Makam masham hka ja ai lamang: Ndai hta shapoi ai lam ni gaw Catechism of hte Catholic Church ngu ai nawku hpung a makam masham sharin ya laika buk hta na makam masham hte seng ai lam ni, shing gyim nga sat nga sa lam hte seng nna nawku hpung sharin matsun lam ni, Cannon law nawku hpung a tara upada hte seng ai lam ni, II ngu na nawku hpung Vatican zup hpawng daw dan matsun ni hte kaga nawku hpung a sharin shaga ai lam ni, wa sarabyin a matsun laika hte seng ai lam ni hpe shapoi ya ai. Bat langai ya shani shagu shapoi ya nga ai hta ndai lang gaw minit 8 hte 10 daeram na ai lamang rai nga ai. Nawku Hpung Labau Lamang: Ndai lamang hta gaw Kahtawlik nawku hpung a labau, Myanmar mung dan Kahtawlik sasana labau, sasana magam majen je lai wa ai magam gun ni a labau ni hpe tang madun ai lamang rai nga ai. 

San Pra ai ni a Labau: San pra ai masha ni ngu ai gaw hkristan ni yawng a matu kasi kamang ni rai nga ai. Shanhte a sak hkrung lai wa ai prat hkrun lam, shanhte a hkaw tsun sake hkam lai wa ai lam ni gaw prat shagu na hkristan ni a matu n gun la hpa lam ni rai nga ai. RVA Jinghpaw nsen shapoi dat kaw nna san pra ai ni a asak aprat hkrun lam labau, shanhte a kasi la mai ai lak san atsam ni hte shanhte a sharin shaga ai lam ni hpe shapoi ya ai rai nga ai.

San ga mahtai lu na sa ga ban dung du na: Anhte wun pawng sha ni malawng maga agw tsaw tsan ai shara buga ni hkan shanu nga pra nga ai ni rai ga ai majaw makam masham nawku hpung hte seng nna atsawm sha sharin hkaja la lu ai lam ni n nga ga ai. Nawku hpung hte seng ai nawku hpung a sharin shaga ai lam ni hte seng nna shanhte nchye na ai, nchye madat ai lam ni law law nga mai ai. Hpung masha ni tiang a makam masham hte seng nna chye mayu ai mahtai ni hpe san la nna mahtai lu la lu na matu RVA Jinghpaw nsen shapoi dap kaw nna ndai lamang hpe shapoi ya nga ai rai nga ai. Bat mali ya shani shagu minit 10 daram aten la nna ndai lamang hpe shapoi ya ai. 

Sum Roi: Karai Kasang a mungga hpe asan sha chye na lu na matu ga shadawn ni hpe lang nna madu yesu shi a sape ni hpe sharin shaga ai lam galaw ai. Dai zawn sha kabu gara ai shiga sharin matsun ai lam ni hpe hpung masha ni asan sha chye na la lu u ga matu Sum Roi kadun ni hpe galaw nna shapoi ya ai. Ndai lamang gaw minit 15 daram aten la ai hte shata mi hta kalang lahkawng lang daram laban shani hta shapoi ya ai. Saradaw ni a mungga: Saradaw ni a mungga hpe gaw hpung masha ni chyu sha nrai wun pawng sha ni yawng hkap madat la mayu ma ai. Saradaw ni ngu ai gaw nawku hpung a ning baw sha mung nrai myu sha ni a ning baw ni mung rai nga ma ai. Dai re ai majaw laban shani na saradaw ni a mungga hpe nsen rim la nna bat masum ya shani shapoi ya ai. Myu sha ni yawng a matu ahkyak ai shiga ni hpe tsun shana ra ai lam ni nga wa yang mung saradaw ni hku nna shanhte a mungga hta tsun shalawm ya ai rai nga ai. 

 

Shiga jaw ai lamang ni (Information) 

Dai ni prat hta shiga ngu ai gaw uhpung uhpawng kata hta nnga nmai ahkyak ai lam kaba langai mi rai nga ai. Makau grup yin hta byin pru nga ai mabyin masa lam ni hpe na chye ai a marang e tinang prat hpe galai la ra ai lam ni nga yang mung galai gram la lu shangun nga ai. Hpang jahtum hpa ni byin pru nga ai ngu ai shiga ni hpe na chye lu ai a marang e tinang a uhpung uhpawng gaw galoi mung su hprang nga ai uhpung uhpawng byin tai nga let tinang hte tinang a uhpug uhpawng mung rawt jat bawng ring ai maga deyawng wa lu mai nga ai. Ndai lam ni a majaw RVA JInghpaw nsen shapoi dap kaw nna Nawku hpung shiga hte buga shiga ni hpe shapoi ya ai. 

Nawku Hpung Shiga: Ndai gaw CNS Vatican, Vatican Radio, VIS Vatican, EWTN, Fides, Ucan, BBC, CCN hte kaga shiga dap kaba ni kaw nna lu la ai mung kan mung dan shara shagu hta byin nga ai nawku hpung hte seng ai shiga ni rai nga ai. Madung hku nna wa sarabyin a mungga ni hpe shapoi ya ai. Buga na nawku hpung a shamu shamawt ai shiga ni hpe mung shapoi ya ai. Buga Shiga: Myanmar mung dan gaw mung masa hte seng nna Democrecy masa mung dan byin tai wa sai rai nga ai. Mung masa kalai shai ai lam ni hpe lam hte lam galaw nga sai rai nga ai. Ndai zawn rai galai shai wa ai masa tha byin pru nga ai lam ni hte seng nna mung chying sha ni grai myit lawm ai hte na chye mayu nga ma ai rai nga ai. Dai re ai majaw RVA Jinghpaw nsen shapoi dat kaw nna ya ya byin nga ai buga na shiga ni hpe mung shapoi ya ai. RVA Jinghpaw nsen shapoi dap kaw nna buga shiga ni hpe bat masum ya shani shagu shapoi ya nna nawku hpung shiga ni hpe gaw bat manga ya shani shagu minit 10 daram ram shapoi ya nga ai. 

 

Hpaji Sharin Shapan ya ai lamang ni (Educating) 

Wunpawng sha ni malawng maga gaw bum nga masha ni rai ga ai hte tsi rung hpaji jawng zawn re ai ni nnga ai shara tsaw tsan ai shara ni hkan shanu nga ai ni rai ga ai. Nawku hpung a sharin shaga ai lam ni hte Karai a mungga ni hpe sharin shaga ya na ra ai zawn hkamja lam, ding hku ngwi pyaw lam hte galaw lu galaw sha lam ni hpe sharin jahprang ya na matu mung ra nga ai. Dai re ai majaw RVA Jinghpaw nsen shapoi dap kaw nna hpaji ningli lamang, ding hku lamang, hkam ja lam lamang, hkai lu hkai sha rem lu rem sha hte seng ai lamang ni hpe shapoi ya nga ga ai rai nga ai. 

 

Hkamja lam lamang: Myanmar mung dan gaw mung kan hta matsan dik mung dan langai rai nga ai majaw mung chying sha ni hpe tsi gawn lajangh ai lam hte lam magup nung ra ai mung dan rai nga ai. Tsaw tsan ai shara ni hkan shanu nga ai mung chying sha ni htap htuk ai tsi gawn lajang lam ni lu la matu ngu ai gaw grau nna pyi yak la nga ai. Anhte a wunpawng buga hta nga yang mung Hka Li, TB sin wawp ana hta kaga machyi makaw ana akya ni law law nga ai shara rai nga ai. Dai re ai majaw RVA Jinghpaw nsen shapoi dap magam gun ni hku nna tinang a buga hta byin chye ai ana ahkya machyi makaw lam ni hte seng nna sawk sagawn ai lam ni galaw ai, chye chyang ai ni ka da ai tsi hte seng ai laili laika ni hpe hti nna dang lu ai daram hkamja lam hte seng nna hpaji jaw gam garan ai lamang ni hpe shapoi ya nga ai rai nga ai. Kalang lang chye chyang kung kyang ai sarawun tsi du kaba ni hpe saw shaga nna hkamja lam hte seng ai hkaw tsun lamang ni hpe mung shapoi ya nga ai rai nga ai. Ya ndai daw de gaw Myitkyina kaw rung daju CHARD ngu ai nawku hpung hkaja bawng ring dap kaw nna buga hta ta tut byin chye ai machyi makaw lam ni kaw nna lawt lu na matu hpaji jaw ai lamang ni hpe shapoi ya nga ga ai rai nga ai. 

Hpaji Ningli HKaja ga i lamang: Ndai lamang hta hpaji hparat a ahkyak ai lam ni, ya ya mung kan hta gyin shapraw dat ai machye machyang nnan ni, hpung tang hpaji hte seng nna sawk sagawn mu tam la lu ai lam ni, mung kan shara shagu shing gyim masha ni ganing rai gara masa hte rawt jat bawng ring wa ai ngu ai lam hte seng ai lamang ni hpe shapoi ya nga ai ra nga ai. Tinang a makau grup yin shing ra tara hpe makawp maga chye na matu hte buga na nhprang sut rai ni hpe manu shadan makawp maga chye wa na matu myit jasu sharawt ya ai lamang ni hpe mung shapoi ya ga ai. Mung hpawm Myammar mung dan gaw Democracy up hkang masa hte mung dan gaw gap sa wa ai mung dan rai nga ai majaw Democracy up hkang masa, shing gyim ahkaw ahkang hte tara rap ra lam ni hte seng ai lamang ni hpe mung ndai lamang hta shapoi ya ga ai. Ndai lamang hpe bat mali ya shani shagu minit 7 daram shapoi ya nga ga ai. 

Htung Hkying: Wunpawng sha ni ngu ai gaw Myanmar mung dan kata na nlaw la ai amyu baw sang langai sha rai nga ai. Mung kan labau hpe yu dat ai shaloi law ai amyu kaba ni hku nna nlaw ai amyu baw sang kaji ni hpe mayu shamat kau ai lam ni nga ai hpe mu lu mai nga ga ai. Dai re ai majaw amyu htung hkying mat wa ai lam ni nbyin u ga makawp maga na matu mung ra nga ai majaw RVA Jinghpaw nsen shapoi dap kaw nna tinang a htung hkying, laili laika, lai htung masa ni hpe sharin shapna ya ai lam ni mung galaw ga ai. Tinang htung khying a tsawm htap manu dan ai lam ni hpe makawp maga tsawra chye wa lu na matu myit jasu sharawt ya ai lamang ni hpe mung shapoi ya nga ai rai nga ai. Ndai zawn tinang a htung hkying hpe tsawra chye wa hkra sharin shaga ya ai zawn manang ni a htung hkying lai htung masa ni hpe mung manu shadan hkungga ya chye ai myit masa ni nga wa hkra mung garum ya ai rai nga ai. Ndai lamang hpe gaw bat kyu ya shani shagu minit 6 daram shapoi ya nga ga ai rai nga ai. 

Ramma: Dai ni ramma ni ngu ai hpe hpawt ni na nawku hpung hte mung dan a ning baw ning la ni rai nga ma ai majaw shanhte a prat hpe htap htuk ai hku shading sharai matsun madun ya ai lam ni galaw ya na matu ra ahkyak nga mali ai. Ramma ni hpe matsun madun shading sharai n-gun jaw ai lamang hpe mung RVA Jinghpaw nsen shapoi dat kaw nna shapoi ya nga ga ai. Dai zawn rai matsun mdun ai lamang ni hta shanhte a prat hpe jahten kau ya lu mai ai Ka Ni nang hpam malu masha hte seng ai lam ni hpe mung hpaji jaw shalawm ya nga ai rai nga ai. Shing gyim prat a manu dan ai lam ni hpe sharin ya ai, tinang hta nga taw sai lak san atsawm ni grau ningja wa hkra n-gun jaw ya ai, prat hta daw dan la ra na ning gam ni mu mada wa ai shaloi ni hkan mung htap htuk jaw ang ai lam hpe lata la hkawm sa chye na matu hpaji jaw ya ai lamang ni hpe mung shapoi ya nga ga ai rai nga ai. 

Kun Ding Hku: Kun Ding Hku ngu ai gaw shing gyim masha uhpung uhpawng mahkra a npawt nhpang shara rai nga ai. Kun Ding Hku ngu ai ahkyak ai ngu ai lam hpe RVA Jinghpaw nsen shapoi dap kaw nna shapoi ya nga ga ai. Kun ding hku hta byin pru chye ai ru yak mang hkang lam ni hpe yan la lu na matu hpaji jaw ai lamang ni, kashu kasha ma ni hpe kara hku kaning rai bau maka la ra ai ngu ai lam ni hpe matsun madun ya ai lamang ni, hkristian kun ding hku prat hpe awng dang ai hte gara hku kaning rai nga sa lu mai ai ngu ai lam ni hpe shapoi ya ai. Kalang marang kung kyang ai sarawun tsi du kaba ni hpe saw shaga nna hkriatan kun ding hku kata kashu kasha shangai shaprat lam ni hte seng ai hpaji jaw lamang ni hpe mung shapoi ya ai rai nga ai. 

Hkrum zup mung jahta: Masha ni a mahkrum madup hpe la nna tinang a prat hpe sharai la na matu mung ra nga ai. Masha kaga ni a awng dang ai lam ni hte mai kaja ai lam ni hpe madat la ai hku nna tinang a prat hpe n-gun ban la lu mai nga ai. Dai re ai majaw RVA Jinghpaw nsen shapoi dap hku nna mung masa galaw nga ai ni, nawku hpung ning baw ni, sarawun tsi du kaba ni, awng dang ai hpaga htingga galaw sha ai ni, mying dan hkung ai shing ni masha ni, hpe shaga la nna shanhte hte hkrum zup mung jahta lam ni galaw nna shanhte a awng dang lam, awng dang wa hkra yak hkak lam ni hpe gara hku kaning rai tawt lai la lu ai lam ni hte shanhte a kung kyang ai lam ni hpe shiga madat ni hpe gam garan ya lu hkra shanhte hte hkrum shaga nna radio kaw nna shapoi ya ai lam ni galaw ai rai nga ai. 

Hkai lu hkai sha lam: Wunpawng sha ni malawng maga gaw hkai lu hkai sha bungli hpe madung da nna kan bau ai rai nga ai. RVA Jinghpaw nsen shapoi dat kaw nna hkai lu hkai sha lam hte seng nna hpaji jaw ai lam ni galaw ya ai, tinang a sun hkaw na hta hkai shatut da sai nsi nai ni hpe gara hku makawp maga lakawn la ra ai ngu ai lam ni hte hkai nmai ni hte byin pru chye ai jahten shaza lam ni kaw nna makawp maga la lu na matu hpaji ai lamang ni hpe shapoi ya nga ai. 

 

Shangwi shapyaw yaa ai lamang (Entertainment Programs) 

Shangwi shapyaw ya ai lamang ni gaw RVA Jinghpaw nsen shapoi dap a madung lamang nrai nga ai rai tim shing gyim masha hpe shangwi shapyaw ya ai lamang ngu ai gaw koi jahkrat kau da mai ai lamang mung nrai nga ai. Dai re ai majaw RVA Jinghpaw nsen shapoi dap kaw nna Mahkawn kum hpa lamang ni hte mahkawn ni hpe shapoi ya ai. Ndai lamang hte shiga madat ni hku nna shada da ai matu shangai nhtoi, ladu hkrum nhtoi hte myit dum kam hpa hku nna mahkawn kum hpa hpyi ai lam ni galaw ai hku nna shada tsawra hku hkau ai lam ni grau ngang kang wa hkra galaw la ai. Ndai lamang hta ra ai hta hkan nna makam masham mahkawn, buga shakawn mahkawn ni, sum tsaw sum ra mahkawn ni du hkra shapoi ya ga ai. 

 

Lak San Lamang ni (Special Programs) 

Shani shagu ding run shapoi ya nga ai lamang ni hta lai nna lak san ahkyak ai nhtoi ni hta lak san lamang ni hpe mung shapoi ya ga ai. Ga shadawn Mung kan sim sa nhtoi, Chyoi pra ai laban bat, Kanu Kawa Poi, hte kaga ahkyak ai htoi ni.


Matut Mahkai Ga

Facebook