RVAKS Logo

RVA Jinghpaw Nsen Shapoi Dap 

Radio Veritas Asia nsen shapoi dap kaw nna myu sha ga law law the nsen shapoi nga ai hta RVA Jinghpaw Nsen Shapoi Dap gaw Myanmar mung dan Jing hpaw mung daw hta shanu nga ai wun pawng sha ni hpang de madung da nna shapoi ya nga ai nsen shapoi dap rai nga ai. Wun pawng sha ni gaw madung hku nna Myanmar mung dan Jinghpaw mung daw hta shanu nga ai myu baw sang ni rai ma ai rai tim, Mi wa gun san mung dan, Thai, India hte kaga mung kan mung dan shara shagu hkan mung chyam bra nga pra nga ma ai.

Myanmar mung dan gaw Buddha makam masham hpe hkap la hkam sham ai ni malawng maga shanu nga ai mung dan rai nga ai majaw Karai Kasang a mungga hpe hkap na la na matu yak la nga ai. Sasana majen je ai jau ma ma ni aloi sha ndu lu ai tsaw tsan ai bum ga hkan shanu nga ai myu sha ni hku nna Karai Kasang a mungga hpe na la lu na matu grau nna pyi yak la nga ai. Karai Kasang a mungga hpe hkap la mayu ai ni law law nga nga ma ai rai tim buga hta magam gun ai jau ma ma magam gun ni nlaw ai majaw mung hkawm wa hkawm sa yak hkak ai the prat dep matut mahkai arung arai ni nnga ai a majaw mung Karai Karai Kasang a mungga hpe tang du hkra hkaw tsun shachyam shabra ai lam ni n galaw lu ai rai nga ai. 

Ndai zawn re ai masa hta RVA Jinghaw Nsen Shapoi dap kaw nna wun pawng sha ni hpang de Karai Kasang a teng man mungga hpe lani mi hta lahkawng lang shapoi ya nga ai rai nga ai. “Radio nsen shapoi dap ni law law nga ai hta na, Myu sha ni hpe makam masham sharin ya ai, shing gyim tsawm htap nga sat nga sa lam ni hpe sharin ya ai, rawt jat bawng ring galu kaba wa hkra garum ya nga ai gaw ndai RVA Jinghpaw Nsen Shapoi Dap chyu sha re” nga nna lai wa sai 2001 ning Myitkyina mare hta galaw lai wa ai RVA shiga madat ai ni the hkrum zup hpawng hta Wasaradaw Pawlu Zing Htung Grawng tsun lai wa yu ai. 

RVA Jinghpaw Nsen Shapoi Dap kaw nna shani shagu Myanmar mung gin dai ahkying jahpawt hkying 6 kaw nna 6:30 shana maga de hkying 7 kaw nna 7: 30 lani mi hta lahkawng lang nsen shapoi nga ga ai rai nga ai. Jahpawt daw shapoi ya nga ai meter band gaw 31 MHZ 9.545 hta rai nna shana maga na gaw meter band 19 MHZ 15.225 hta rai nga ai. 

 

Labau (History) 

RVA nsen shapoi dap hta jinghpaw ga hta nsen shapoi lu na matu shakut lajang ya lai wa ai gaw Columban jau Wa Jau Murphy rai nga ai. Wa Jau Murphy gaw Myanmar mung dan, Jinghpaw mung daw, Manmaw mare hta 8 ning nga nna sasana galaw lai yu ai jau rai nga ai. Ndai zawn rai jinghpaw mung daw hta 8 ning sasana magam gun hpai ngut ai hpang Wa Jau Murphy gaw Vatican TV ngu ai hkrang mu sen na hta Vatican radio lamang ni a lit hkam jau hku nna lit jaw hkrum lai wa ai. Ndai gaw RVA jinghpaw nsen shapoi dap byin tai wa na lam a npawt nan rai nga ai. Jinghpaw mung daw hta shanu nga ai wun pawng sha ni hte Wa Jau Murphy a lapran myit dun tsawra hkat ai Wa Jau Murphy a tsawra myit kaba gaw Radio Veritas Asia nsen shapoi dap hta Jinghpaw ga the nsen shapoi lu na lam hpe byin pru shangun lai wa sai rai nga ai.

Myu sha ga the kabu gara ai shiga shapoi lu na Wa Jau Murphy a yaw shada myit mada ai lam hpe dai shaloi na Myitkyina ginwang up saradaw rai nga ai Wa saradaw John How the bawng ban lai wa ai. Wa Jau Murphy the Wa saradaw John How yan myit hkrum lai wa ai the rau ndai nsen shapoi na masing hpe Myanmar mung dan na saradaw ni a madi shadaw ai lam hpe lu la na matu Wa Jau Murphy, Wa saradaw How the Wa saradaw Pawlu Zing Htung Grawng ni shakut lai wa ma ai. Myanmar mung dan saradaw ni a madi shadaw ai hpe lu la ai the rau myu sha ga the nsen shapoi lu na tang shawn ai laika hpe dai shaloi na Philippines mung dan Kawhtawlik nawku hpung a ning baw rai nga ai Cardinal Sin hpang de shaloi dat ai. Tang shawn laika hpe Cardinal sin hkap la myit hkrum ya lai wa ai the rau Myanmar mung dan hte thing bu mung dan ni rai nga ai Miwa gum san mung dan, India hte Thai mung dan ni de nsen shapoi hpang wa sai rai nga ai. Ndai labau shang nhtoi gaw 1982 ning August shata 20 ya shani rai nga ai.


Matut Mahkai Ga

Facebook